एजेन्सी – इङ्गलिस प्रिमियर लिग अन्तर्गत शनिबार राती भएको खेलमा आर्सनलले स्टक सिटीलाई उसकै घरेलु मैदानमा ४-१को फराकिलो अन्तरले पराजित गरेको छ।
खेलको ४२औं मिनेटमा हेक्टर बेलेरिनको पासलाई सदुपयोग गर्दै ओलिभिएर जिरूडले आर्सनललाई अग्रता दिलाएका थिए। दोश्रो हाफको ५५औं मिनेटमा एलेक्सिस स्यान्चेजको पासमा मेसुट ओजिलले गोल गर्दै २ गोलको अग्रता बनाए।
पिटर क्राउचले हेडीङ्ग गर्ने प्रयासमा बललाई हातले जाली चुमाएपनि उक्त गोल रेफ्रीले दिएपछि खेलमा स्टोकको फर्कने आशा पलाएको थियो। तर ७६औं मिनेटमा स्यान्चेजले पुन: गोल गर्दै खेलमा आर्सनललाई २ गोलको अग्रता दिलाए। जिरुडले पुन: ८०औं मिनेटमा गोल गर्दै आर्सनलको जित सुनिश्चित पारेका थिए।
शीर्ष ४ मा पर्ने होड रोमान्चक बन्दै जाँदा आर्सनलले जितसंगै आफुभन्दा माथि रहेका २ टोलीमाथि दबाब कायम गरेको छ। पाँचौ स्थानमा रहेको आर्सनलको ३६ खेलमा ६९ अंक छ भने लिभरपुल ७०मा चौथो र सिटि ७२ अंक लिएर तेश्रो स्थानमा छन्।
