एजेन्सी – स्पेनिस ला लिगा अन्तर्गत आइतबार राती हुने खेलमा रियल म्याड्रिडले आफ्नो घरेलु मैदान सान्टियागो बर्नाबाउमा सेभिल्लाको सामना गर्दैछ।
अंक तालिकामा चौथो स्थानमा रहेको सेभिल्ला च्याम्पियन्स लिगको लागि लगभग छनोट भइसकेको अवस्थामा रियल म्याड्रिडको उपाधि यात्रामा रोक लगाउने सेभिल्लाको प्रयास हुनेछ। शीर्ष २ स्थान ओगटेका म्याड्रिड र बार्सिलोनाको समान अंक छ भने म्याड्रिडले १ खेल कम खेलेको छ।
यस खेलका लागि रियल म्याड्रिडका ग्यारेथ बेल र ड्यानी कार्भाजल चोटका कारण उपस्थित हुने छैनन्। बेलको स्थानमा इस्को र कार्भाजलको ठाउँमा नाचो वा ड्यानिलोले खेल्नेछन। सेभिल्लाको लागि डिफेन्डर बेनोइट ट्रेमोलिनास र पाब्लो सरबिया उपलब्ध छैनन्। ट्रेमोलिनस चोटका कारण विश्राममा छन् भने सरबिया प्रतिबन्धका कारण यस खेलमा अनुपस्थित रहनेछन्।
यी दुइ टोलीबिचको पछिल्लो लिग खेलमा सेभिल्लाले अन्तिम मिनेटमा गोल गर्दै २-१को जित हासिल गरेको थियो।
रियलले सेभिल्लासंग घरेलु मैदान खेलेका पछिल्ला ११ मध्ये १० खेलमा जित हात पारेको छ। सेभिल्लाले ला लिगामा आफुले खेलेका पछिल्ला पाँच अवे खेलमा जित हात पार्न सकेको छैन।
खेल नेपाली समयानुसार आज राती ११:४५ बजे हुनेछ।
