एजेन्सी – स्पेनिस ला लिगा अन्तर्गत आइतबार हुने खेलमा अंक तालिकाको शीर्ष स्थानमा रहेको बार्सिलोनाले लास पाल्मासंग भिड्दैछ।
आफ्नो पछिल्ला ४ लिग खेलमा जित हात पारेको बार्सिलोना यस खेलमा जितसंगै शीर्षस्थानमा आफ्नो दबाब कायम राख्ने योजनामा हुनेछ। लास पाल्मास तालिकाको १४औं स्थानमा छ र उसको रेलिगेसनको डर हटिसकेको छ। लास पाल्मासका लागि यस खेलमा रियलका पुर्वखेलाडी जेसे र केभिन प्रिन्स बोटेङ प्रतिबन्धबाट फर्कनेछन्। यद्दपी ड्यानी कास्टेलानो र मारको लिभाजा क्रमस: चोट र प्रतिबन्धका कारण उपलब्ध हुने छैनन्।
बार्सिलोनाको लागि पनि एलेक्स भिडल र राफिन्हा चोटका कारण सिजनभरका लागि अनुपस्थित रहने भएका छन्। सर्जी रोबर्टो पछिल्लो खेलमा पहेंलो कार्ड पाएका कारण खेलमा उपस्थित रहने छैनन्। जाभिएर मास्सेरानोले डिफेन्समा स्थान पाउनेछन्।
घरेलु टोली लास पाल्मासले आफ्नो पछिल्ला ३ खेलमा कुनै गोल गर्न सकेको छैन भने बार्सिलोनाले आफ्नो पछिल्ला ९ मध्ये ८ खेलमा कम्तिमा ३ गोल गरेको छ। लिगमा पछिल्ला ३ खेल हारेको लास पाल्मासले बार्सिलोनासंगका पछिल्ला ३ खेलमा पराजित हुन् परेको छ।
यी दुइ बिचको पहिलो लिग खेलमा बार्सिलोना ५-०ले विजयी भएको थियो।
खेल नेपाली समयानुसार रातको ११:४५ बजे सुरु हुनेछ।
