एजेन्सी – ब्राजिलियन फरवार्ड नेयमारको ह्याट्रिकको मद्दतले स्पेनिस ला लिगा अन्तर्गत आइतबार राती भएको खेलमा बार्सिलोनाले लास पाल्मासलाई ४-१ले पराजित गरेको छ।
खेलको २५औं मिनेटमा लुइस सुआरेजको पासलाई सदुपयोग गर्दै नेयमारले बार्सालाई अग्रता दिलाएका थिए। त्यसको २ मिनेट नबित्दै नेयमारले दिएको पासमा सुआरेजले गोल गर्दै खेलमा बार्सिलोनाको अग्रता दोब्बर पारे।
दोश्रो हाफको ६३औं मिनेटमा केभिन प्रिन्स बोटेङको पासमा पेड्रो बिगासले गोल गरेपछि घरेलु टोलीको खेलमा फर्कने आशा पलाएको थियो। तर, नेयमारले ४ मिनेटको अन्तरमा २ गोल गर्दै आफ्नो ह्याट्रिक पुरा गरेपछि बार्सिलोनाको जित सुनिश्चित भएको थियो।
उनले राकिटिचको पासमा ६७औं मिनेट र जोर्डी अल्बाको पासमा ७१औं मिनेटमा गोल गर्दै आफ्नो ह्याट्रिक पुरा गरेका थिए।
यस जितसंगै बार्सिलोना र रियल अंक तालिकामा समान अंक लिएर क्रमश: पहिलो र दोश्रो स्थानमा छन्। रियलले बार्सिलोनाको तुलनामा १ खेल कम खेलेको छ।
