लण्डन (एजेन्सी) – इङ्गलिस प्रिमियर लिग अन्तर्गत शनिबार राती भएको खेलमा म्यानचेस्टर युनाईटेडले टोटेनहम हट्स्परको घरेलु मैदान व्हाइट हार्ट लेनमा भएको खेलमा २-१को पराजय भोगेको छ।

खेलको छैठौं मिनेटमा भिक्टर वानयामाले हेडर मार्फत गोल गर्दै घरेलु टोलीलाई अग्रता दिलाएका थिए। उनले बेन डेभिसले छोटो कर्नरबाट दिएको क्रसलाई सजिलै गोलमा परिणत गरेका थिए। पहिलो हाफमा दबाबमा रहेको युनाईटेडले दोश्रो हाफमा पनि राम्रो सुरुवात लिन सकेन। ह्यारी केनले ४८औं मिनेटमा स्पर्सको अग्रता दोब्बर पारेका थिए। उनले क्रिस्टियन एरिक्सनको फ्रिकिकमा गोलरक्षकलाई दुविधामा पार्दै गोल गरेका थिए।

युनाईटेडका कप्तान वायन रुनीले खेलको ७१औं मिनेटमा एन्थोनी मार्सियलको पासलाई सदुपयोग गर्दै गोल गरेपछि जोसे मौरिन्होको टोलीले खेलमा फर्कने आशा जगाएको थियो। तर दुवै टोलीबाट थप गोल हुन नसकेपछि खेल २-१मा सकियो।

यस जितसंगै टोटेनहमले लिग तालिकामा आफ्नो दोश्रो स्थान पक्का गरेको छ भने म्यानचेस्टर युनाईटेडले शीर्ष ४ मा नअटाउने निश्चित भएको छ। यो टोटेनहमको घरेलु मैदान व्हाइट हार्ट लेनमा खेलिएको अन्तिम खेल पनि थियो। यससंगै टोटेनहमले अर्को सिजन वेम्ब्लीमा खेल्ने र त्यसपछि नयाँ मैदानमा आउनेछ।