म्याड्रिड (एजेन्सी) – रियल म्याड्रिडका स्टार फरवार्ड क्रिस्टियानो रोनाल्डो क्लबकै इतिहासमा ४०० गोल पुरा गर्ने पहिलो खेलाडी बनेका छन्। रोनाल्डोले सेभिल्लासंग जितमा पहिलो हाफमा गोल गर्दै व्यक्तिगत ४०० गोल पुरा गरेका हुन्।
रोनाल्डोले अगष्ट २९, २००९का दिन डेपोर्टिभो विरुद्ध आफ्नो डेब्यु खेलमा पेनाल्टी मार्फत गोल गर्दै म्याड्रिडको लागि खाता खोलेका थिए। उनले ४०० गोलमध्य २८२ गोल ला लिगामा प्रहार गरेका हुन् भने ८८ गोल च्याम्पियन्स लिगमा गरेका हुन्। उनले कोपा डेल रेमा २२ गोल, क्लब विश्वकपमा ४ गोल, स्पेनिस सुपर कपमा ३ गोल र यूईएफा सुपर कपमा २ गोल गरेका छन्। उनले ३९१ खेल खेल्दै ४०० गोल पुरा गरेका हुन्।
सन् २००९मा म्यानचेस्टर युनाईटेडबाट स्पेनको महारथी रियल म्याड्रिड आएका रोनाल्डोले १ पटक ला लिगा उपाधि जितेका छन् भने २ पटक च्याम्पियन्स लिग उठाइसकेका छन्। यस सिजन रियल च्याम्पियन्स लिगको फाइनलमा पुगिसकेको छ भने ला लिगा जित्ने सम्भावना पनि उत्तिकै बलियो रहेको छ।
