लण्डन (एजेन्सी) – इङ्गलिस प्रिमियर लिग अन्तर्गत सोमबार राती चेल्सीको घरेलु मैदान स्टाम्फर्ड ब्रिजमा भएको लिग खेलमा वाटफर्ड ४-३ गोलअन्तरले पराजित भएको छ। लिग उपाधि पक्का गरिसकेको अवस्थामा प्रशिक्षक कोन्टेले केहि मुख्य खेलाडीलाई विश्राम दिएका थिए।
खेलको २२औं मिनेटमा कप्तान जोन टेरीले विलियनको कर्नरबाट आएको बललाई पोष्टको दिशा दिंदै चेल्सीलाई अग्रता दिलाएका थिए। तर, त्यसको १ मिनेट नबित्दै टेरीको गल्तीको फाइदा उठाउँदै वाटफर्डका लागि एटिएन कपुएले बराबरी गोल गरे। ३६औं मिनेटमा सेजार एज्पिलिक्वेटाले गोल गर्दै चेल्सीलाई पुन: अग्रता दिलाएका थिए।
पछिल्लो खेलमा वेष्ट ब्रमविरुद्ध निर्णायक गोल गरेर चेल्सीको लागि उपाधि पक्का गरेका फरवार्ड मिसी बासुआइले ४९औं मिनेटमा चेल्सीको अग्रता दोब्बर पारेका थिए। तर, त्यसको केहि मिनेटमै वाटफर्डका ड्यारील यानमाटले उत्कृष्ट गोल गर्दै वाटफर्डलाई खेलमा फर्काए। ७१औं मिनेटमा ओकाकाले गोल गर्दै खेललाई फेरी बराबरीमा ल्याएका थिए। तर, निर्धारीत समय सकिन २ मिनेट बाँकी हुँदा सेस फाब्रीगासले गोल गर्दै चेल्सीको जित सुनिश्चित पारे।
