एजेन्सी – साविक विजेता पेरिस सेन्ट जर्मन (पिएसजी)लाई ८ अंकले पछि पार्दै ए.एस. मोनाकोले फ्रेन्च लिगको उपाधि जितेको छ। गतसाता मार्सेलाई २-०ले पराजित गरेसँगै मोनाकोको जित पक्का भएपछि उसलाई उपाधि प्रदान गरिएको थियो।
अन्तिम चरणको खेलमा मोनाकोले स्टाद रेन्नेसलाई ३-२ले पराजित गर्दै लिग सिजनलाई सुखद अन्त्य गरेको छ। मोनाकोका लागि फबिन्हो, जेमर्सन र योर्गेले गोल गरेका थिए।
यसैगरी पीएसजीले भने आफ्नो लिगको अन्तिम खेलमा केनसंग १-१को बराबरी खेल्यो। एड्रीएन राबिओले पेरिसका लागि खेलको एकमात्र गोल गरेका थिए।
मोनाकोले ३८ खेलमा ३० जित, ५ बराबरी र ३ हारसँगै कुल ९५ अंक जोड्दै सिजन अन्त्य गर्यो भने पेरिसले २७ जित, ६ बराबरी र ५ हारको सामना गर्यो। उसले कुल ८७ अंकमात्र जोड्न सक्यो। तेश्रो स्थानमा रहेको निसले ७८ अंक जोड्यो भने चौथोमा रहेको लियोंको ६७ अंक रहेको थियो।
