एजेन्सी – इटालियन सिरी ‘ए’ अन्तर्गत आइतबारको खेलमा क्रोटोनेलाई ३-०ले पराजित गर्दै युभेन्टसले लगातार छैठौं पटक इटालियन लिगको उपाधि जितेको छ।
मारियो मान्जुकिचको १२औं मिनेटको गोलले खेलमा अग्रता लिएको युभेन्टसले पहिलो हाफको अन्त्यतिर पाउलो डीबालाको फ्रिकिकको मद्दतले अग्रता दोब्बर पार्यो। खेलको अन्त्यतिर एलेक्स स्यान्ड्रोले गोल गर्दै युभेन्टसको जित सुनिश्चित पारेका थिए।
यस जितसँगै युभेन्टसले दोश्रो स्थानको रोमसँग ४ अंकको अग्रता बनाएको हो। गतसाता रोमाले युभेन्टसलाई पराजित गरेपछि लिगको छिनोफानो एक साता लम्बिएको थियो। युभेन्टसले हाल लिगको ३७ खेलमा २८ जित, ४ बराबरी र ५ हारसहित कुल ८८ अंक जोडेको छ भने रोमको ८४ अंक रहेको छ।
यसै साता लाजियोलाई पराजित गर्दै इटालियन कप जितेको युभेन्टसलाई अर्को महिना हुने च्याम्पियन्स लिग फाइनलमा रियल म्याड्रिडलाई पराजित गर्दै तेहेरो उपाधि हात पार्ने अवसर जुरेको छ।
