एजेन्सी – स्पेनिस ला लिगा सम्पन्न भएसँगै यस सिजनको सर्वाधिक गोलकर्ताले पाउने पिचिची अवार्डको पनि टुंगो लागेको छ। बार्सिलोनाका स्तर फरवार्ड लियोनेल मेस्सीले यस सिजनमा ३७ गोल गर्दै चौथोपटक अवार्ड हात पारेका छन्।
गत सिजनका उपाधि विजेता लुइस सुआरेजभन्दा ८ गोल बढी प्रहार गरेका मेस्सीले पछिल्लो पटक २०१२/१३ सिजनमा यस उपाधि जितेका थिए। लिग अन्तर्गत अन्तिम चरणको खेलमा पेनाल्टी मिस गरेका मेस्सीले थप २ गोल गरेपछि यस सिजनमा ३७ गोल गरेका थिए। २९ गोल गरेका लुइस सुआरेज दोश्रो स्थानमा रहे भने तेश्रो स्थानमा २५ गोल गरेका रियल म्याड्रिडका क्रिस्टियानो रोनाल्डो रहेका छन्।
मेस्सीको यस उपाधिसँगै पछिल्ला सात सिजनमा उपाधि जित्ने खेलाडीले औसतमा प्रत्यक खेल कम्तिमा १ गोल गरेको इतिहस रहेको छ। मेस्सीको यो रेकर्डले उनले युरोपियन गोल्डेन बुट जित्ने सम्भावना पनि बढेर गएको छ। यद्दपी यसका लागि उनले युरोपको सिजन अन्त्यसम्म प्रतिक्षा गर्नुपर्ने हुन्छ।
चौथो पिचिची उपाधि हात पारेसँगै मेस्सिले रियल म्याड्रिडका फेरेन्च पुस्काससँग बराबरी गरेका छन्। यद्दपी ५ पटक उपाधि जितेका रियलकै पूर्व खेलाडी ह्युगो स्यान्चेज, बार्साका क्विनी र अल्फ्रेडो डी स्टेफानो संयुक्त रुपमा दोश्रो स्थानमा छन्। ६ पटक पिचिचीजितेका टेल्मो जारा शीर्षस्थानमा रहेका छन्।
