एजेन्सी – युरोपा लिगको फाइनल खेलमा इङ्गलिस टोली म्यानचेस्टर युनाइटेड र डच टोली आयाक्स एम्स्टरड्याम फाइनलमा भिड्दैछन्। यसैक्रममा म्यानचेस्टर युनाइटेडका दिग्गज गोलकिपर एडविन भ्यान डर सारले भने आफुले फाइनल खेलमा आयाक्सको समर्थन गर्ने बताएका छन्।
म्यानचेस्टर क्लबका लागि तिन च्याम्पियन्स लिग फाइनल खेलेका भ्यान डर सारले क्लबलाई सन् २००८मा उपाधि दिलाएका थिए। उनकै पेनाल्टी बचाऊसँगै युनाइटेडले त्यस समय उपाधि जितेको थियो। उनले सन् २००९ र २०११को फाइनलमा भने बार्सिलोनासँग पराजय भोगेका थिए। उनले ६ वर्ष युनाइटेडमा बिताउँदा घरेलु लिग र लिग कपको उपाधि पनि जितेका थिए।
आफ्नो करियरको सुरुवात आयाक्सबाट गरेका उनले डच क्लबबाट पनि च्याम्पियन्स लिग र लिग उपाधि जितेका थिए। खेलाडीका रुपमा ९ वर्ष नेदरल्याण्डमा रहेर उनले ४ लिग उपाधि जितेका थिए।
हाल उनि क्लबका प्रमुख कार्यकारी अधिकृत (सी.ई.ओ) पनि रहेका छन्। उनले दुवै क्लब आफ्नो नजिको क्लब रहेपनि आफ्नो समर्थन भने आयाक्सलाई नै जाने बताएका हुन्।
