म्यानचेस्टर (एजेन्सी)– म्यानचेस्टर सिटीले फ्रान्सेली क्लब मोनाकोबाट २२ बर्षे मिडफिल्डर बर्नान्डो सिल्भालाई भित्राएको छ । सिल्भा सिटीसँग ५ वर्षको सम्झौतामा आबद्ध भएका हुन् ।
प्रशिक्षक पेप ग्वार्डिओलाले ‘समर साइनिंङ’ को सुरुआत सिल्भाबाट गर्दा ट्रान्सफर रकम क्लबले सार्वजनिक गरेको छैन । यद्दपी उनलाई भित्राउन ४३ मिलियन पाउण्डको हाराहारीमा खर्च गरेको अनुमान गरिएको छ ।
‘म उत्साहित छु , अहिले संसारको सबै भन्दा राम्रा मध्येको एक क्लबमा छु ’, सिल्भाले भने,‘यस्तो अवसर पाउँदा ज्यादै खुसी लागेको छ । ’
बेन्फिकाको युथ एकेडेमीबाट आएका सिल्भाले पोर्चुगलको राष्ट्रिय टोलीबाट १० खेल खेलेका छन् । सन् २०१५ मा बेन्फिकाबाट मोनाकोले उनलाई लान झन्डै १६ मिलियन पाउण्ड खर्चेको थियो ।
