एजेन्सी – १० खेलाडीमा सिमित चेल्सीलाई २-१ले पराजित गर्दै आर्सनलले यस सिजनको एफए कपको उपाधि जितेको छ। आर्सनलले उत्कृष्ट प्रदर्शन गरेपछि प्रशिक्षक आर्सेन वेंगरले ऐतिहासिक सातौं एफए कप जितेका हुन्।
खेलको चौथो मिनेटमा एलेक्सिस स्यान्चेजले गोल गर्दै आर्सनललाइ अग्रता दिलाएका थिए। सुरुवाती गोलले दबावमा पारेको चेल्सीले पहिलो हाफमा कुनै मौका बनाउन सकेन। दोश्रो हाफको ६८औं मिनेटमा चेल्सीका भीक्टर मोसेस दोहोरो पहेंलो कार्ड खाँदै मैदानबाहिर निस्केपछि चेल्सी थप दबावमा पारेको थियो। तर, ७६औं मिनेटमा विलियनको पासलाई सदुपयोग गर्दै डिएगो कोष्टाले चेल्सीका लागि बराबरी गोल गरे।
चेल्सीले बरब्रो गोल फर्काएको तीन मिनेट नबित्दै आर्सनलले खेलमा पुन: अग्रता लिएको थियो। ओलिभिएर जिरुडको पासमा आरोन राम्जीले गोल गर्दै आर्सनललाई उपाधितर्फ डोर्याएका थिए। यो जित सँगै आर्सनलले चेल्सीलाई २००३/०४पछि पहिलो पटक एकै सिजनमा दुई पटक पराजित गरेको हो।
उपाधिविहिन रहने खतरा रहेको आर्सनल यस जितसँगै सिजनको सुखद अन्त्य गर्न सफल रहेको छ।
