एजेन्सी – आउँदो जुन ३ तारिखका दिन हुने च्याम्पियन्स लिगको फाइनल खेलका लागि रियल म्याड्रिडका स्टार विङ्गर ग्यारेथ बेल उपलब्ध हुने भएका छन्। गत महिना बार्सिलोनाविरुद्धको खेलमा चोट बोकेपछि उनि विश्राममा रहेका थिए।
२७ वर्षीय वेल्स खेलाडी बेल टोलीको प्रशिक्षणमा सामेल भएका छन् र उनले प्रशिक्षकले चाहेको खण्डमा युभेन्टसविरुद्धको खेलमा सुरुवात गर्नेछन्। बेलको अनुपस्थितिमा इस्कोले म्याड्रिडका लागि राम्रो प्रदर्शन गर्दै आएकाले प्रशिक्षक जिदानलाइ टोली छनोटको बेला टाउको दुखाई बन्ने पक्का छ।
बेलको घरेलु मैदान कार्डिफमा हुने फाइनल खेलका लागि उनि उत्साहित रहेको बताउँदै आएका थिए। कार्डिफमै जन्मिएका बेलले आफु प्रशिक्षणमा फर्किएको र सबैको ध्यान अब फाइनल खेलमा केन्द्रित रहको ट्वीटमार्फत बताएका छन्।
अविक विजेता रियल इतिहासमै पहिलोपटक च्याम्पियन्स लिगको उपाधि लगातार जित्ने दाउमा छ भने युभेन्टस रियलको एकछत्र राजलाई तोड्ने सुरमा हुनेछ। दुवैटोलीले आफ्नो घरेलु लिगको उपाधि जितेका हुन्। युभेन्टस च्याम्पियन्स लिग जितेर तेहेरो उपाधि पुरा गर्ने दाउमा हुनेछ।
