लिभरपुल (एजेन्सी) – इङ्लिश क्लब लिभरपुलले चेल्सीबाट १९ वर्षीय इङ्लिश खेलाडी डोमिनिक सोलान्केलाई आबद्ध गरेको छ । सोलान्के चेल्सीसँगको सम्झौता अन्त्यपछि जुन १ मा आधिकारिक रुपमा लिभरपुलका खेलाडी हुनेछन ।
सम्झौताको अन्त्यपछि खेलाडीलाई आबद्ध गर्दा कुनै रकम तिर्नु नपर्ने भएपनि युवा खेलाडीको हकमा भने क्षतिपूर्ति रकम तिर्नुपर्ने प्रावधान छ। सोलान्केको सम्झौता अन्त्य भएसँगै लिभरपुलले चेल्सीलाई क्षतिपूर्ति रकम तिर्नेछ। क्षतिपूर्ति रकमको निर्णय भने एफएको न्यायाधिकरण कमिटीले तय गर्नेछ। सोलान्के चेल्सीको युथ एकेडेमीका खेलाडी हुन।
विभिन्न उमेर समुहको खेलमा इङ्ल्यान्डलाई प्रतिनिधित्व गर्दौ आएका सोलान्केलाई चेल्सीले स्ट्याम्फर्ड ब्रिजमा थप ३ वर्षको सम्झौतामा राख्न प्रयास गरेपनि उनले नयाँ सम्झौतामा चासो देखाएका थिएनन्।
२०१५ का ‘वर्षको उत्कृष्ट इङ्लिश युवा खेलाडी’ उपाधिबट सम्मानित भएका सोलान्केले चेल्सीबाट डच फुटबल क्लब भिटेससँग १ सिजन लोनमा खेल्दा २५ खेलमा ७ गोल गरेका थिए । सोलान्के हाल इङ्ल्यान्ड यु-२० टोलीसँग उमेर समुहको विश्व कपमा प्रतिस्पर्धा गर्दैछन ।
