एजेन्सी – युरोपेली च्याम्पियन्स लिगको फाइनल खेलमा शनिबार रियल म्याड्रिड र युभेन्टस उपाधिका लागि भिड्दैछन्। वेल्सको कार्डिफ मैदानमा हुने खेलमा रियल पहिलोपटक उपाधि रक्षा गर्ने दाउमा हुनेछ भने युभेन्टस यस सिजनको तेश्रो उपाधि जित्ने सुरमा हुनेछ।
यी दुई टोलीबिचको पछिल्ला ६ खेलमा युभेन्टसले ३ खेलमा जित हात पारेको छ भने रियल म्याड्रिडले १ खेल जितेको छ। २ खेल भने बराबरीमा टुंगिएको छ। यसक्रममा युभेन्टसले १० गोल गरेको छ भने रियलले ७ गोलमात्र गर्न सकेको छ।
यी दुई बिचको पछिल्लो खेल १-१को बराबरीमा सकिएको थियो। सान्टियागो बर्नाबाउमा खेलिएको उक्त खेलमा रियलले पहिलो हाफमा क्रिस्टियानो रोनाल्डोको गोलमा अग्रता लिएको थियो। अल्भारो मोराटाले दोश्रो हाफमा युभेन्टसका लागि बराबरी गोल फर्काएका थिए। युभेन्टसको लागि गोल गरेका मोराटा हाल रियल म्याड्रिड फर्किसकेका छन्।
च्याम्पियन्स लिगको पछिल्ला ८ खेलमध्ये युभेन्टसले ७ खेलमा जित हात पारेको छ। रियलले खेलेको पछिल्लो १२ च्याम्पियन्स लिग खेलमा २ गोल भन्दा बढी प्रहार भएको छ।
