एजेन्सी – फिफा विश्वकप २०१८को छनोट चरण अन्तर्गत समूह ‘जी’मा रहेको स्पेनले झिनो अन्तरले जित हासिल गरेको छ। म्यासेडोनियाको घरेलु मैदानमा स्पेनले विजय हासिल गर्दै आफ्नो अपराजित यात्रा जारि राख्यो।
म्यासेडोनियाको घरेलु मैदानमा भएको खेलमा स्पेनले २-१को कठिन जित दर्ता गर्यो। डेविड सिल्भाले इनीएस्टाको पास सदुपयोग गर्दै १५औं मिनेटमा गोल गर्दै पाहुना टोलीलाई अग्रता दिलाएका थिए। खेलको २७औं मिनेटमा इस्कोले उत्कृष्ट मुभ बनाएर दिएको पासमा चेल्सीका फरवार्ड डिएगो कोस्टाले गोल गर्दै स्पेनको अग्रता दोब्बर पारेका थिए। तर, स्टेफन रिस्टोभ्सकीले घरेलु टोलीका लागि ६६औं मिनेटमा गोल गर्दै खेलमा फर्कने आशा देखाएका थिए। थप गोल हुन नसकेपछि खेल स्पेनले २-१ले जित्यो।
इटालीले पनि लिक्टेनस्टाइनलाई ५-०ले पराजित गर्दै समूहमा अपराजित रह्यो। समूहकै अर्को खेलमा इजरायलले अल्बानियालाई ३-०ले पराजित गर्यो।
समूहको शीर्ष स्थानमा रहेका इटाली र स्पेनले समान ६ खेलमा १६ अंक जोडेका छन्। स्पेनको गोल अन्तर बढी भएकाले इटाली दोश्रो स्थानमा छ। अल्बानिया र इजरायल ९ अंक बोक्दै तेश्रो र चौथो स्थानमा छन्।
खेलको भिडियो:
