एजेन्सी – पोर्चुगलका कप्तान एवं रियल म्याड्रिडका स्टार फरवार्ड क्रिस्टियानो रोनाल्डोले क्लब छाड्ने निर्णय गरेका छन्। पोर्चुगलको दैनिक पत्रिकाहरुले जनाए अनुसार रोनाल्डोले कन्फेडेरेसन कप सकिएपछि स्पेन छाड्ने योजना बनाएका छन्।
पोर्चुगलको पत्रिका ए बोलाले जनाए अनुसार स्पेनिस कर कार्यालयका अधिकारीहरुको व्यवहार देखेर रुष्ट भएका रोनाल्डोले स्पेननै छाड्ने मनसाय बुनेका हुन्। स्पेनका कर कार्यालयका अधिकारीहरुले रोनाल्डोलाई कर छलीको आरोप लगाएका थिए। रोनाल्डोले उक्त आरोपको खण्डन गर्दै आएका छन् र त्यसकै कारण क्लब छाड्ने ‘अपरिवर्तनीय’ निर्णय लिएका हुन्।
४ पटकका ब्यालन डी’ओर विजेता रोनाल्डोले इन्स्टाग्राममा चुप लाग्ने संकेत दिएको तस्बिर राखेका छन्। उनले उक्त तस्बिरमा “कहिलेकाँही चुप लाग्नु नै उत्तम निर्णय हुन्छ” भनेर लेखेका छन्।
रोनाल्डोले सन् २०१६को नोभेम्बरमा रियल म्याड्रिडसँग नयाँ करार गरेका थिए। त्यस समयमा उनले आफु ४१ वर्षसम्म पनि रियलबाटै खेल्ने बताएका थिए। रियल म्याड्रिडले यस सिजन स्पेनिस ला लिगा र युरोपेली च्याम्पियन्स लिगको उपाधि जित्दा निकै महत्त्वपूर्ण भूमिका खेलेका थिए।
