एजेन्सी – फिफाले चार वर्षको अन्तरमा आयोजना गर्दै आएको फिफा कन्फेडेरेसन कप आजबाट सुरु हुँदैछ। ६ महादेशका च्याम्पियन टोलीसँगै विश्वकप विजेता र आयोजक टोलीको सहभागिता रहने यस प्रतियोगितामा कुल १६ खेल खेलिनेछ।
सहभागी ८ टोलीलाई २ समूहमा बिभाजन गरेर लिग कम नकआउट फर्म्याटमा प्रतियोगिता संचालन हुनेछ प्रतियोगिताको समूह ‘ए’मा आयोजक रसियासँगै मेक्सिको, पोर्चुगल र न्युजिल्याण्ड रहेका छन् भने समूह ‘बी’मा जर्मनी, चिली, क्यामरुन र अष्ट्रेलिया छन्।
शनिबार हुने उद्घाटन खेलमा आयोजक रसियाले न्युजिल्याण्डको सामना गर्दैछ। समूहका शीर्ष २ स्थानमा रहने टोलीले सेमिफाइनलमा स्थान बनाउनेछन्। प्रतियोगितामा तेश्रो स्थानको खेल पनि हुनेछ।
यस प्रतियोगितालाई विश्वकपको वार्म अप प्रतियोगिताको रुपमा हेरिंदै आएको छ। रसियाले सन् २०१८मा फिफा विश्वकप आयोजना गर्दैछ।
