एजेन्सी – रसियामा आयोजना हुन गइरहेको फिफा कन्फेडेरेसन कपको दशौँ संस्करणमा ८ टोलीले सहभागिता जनाएका छन्। ४ओटा सहरका ४ फरक रंगशालामा खेलाइने प्रतियोगितामा कुल १६ खेल हुनेछन्।
३० राष्ट्रका विभिन्न ११८ क्लबहरुका खेलाडीहरुले आफ्नो राष्ट्रको प्रतिनिधित्व गर्दैछन्। बायर लेभर्कुसन, पोर्टो, स्पार्टाक मस्को, स्पोर्टीङ लिस्बन र वेलीङटन फिनिक्सका सर्वाधिक ५/५ खेलाडी सहभागी रहेका छन्।
रसियाबाट यस प्रतियोगितामा खेल्ने सम्पूर्ण खेलाडीहरु रसियाकै घरेलु लिग खेल्ने खेलाडीहरु रहेका छन्।
मेक्सिकोका राफेल मार्केज प्रतियोगिताकै सबैभन्दा बढी उमेर भएका खेलाडी हुन्। उनको उमेर ३८ वार्स ४ महिना रहेको छ।
न्युजिल्याण्डका प्रशिक्षक एन्थोनी हड्सन प्रतियोगिता इतिहासकै सबैभन्दा युवा प्रशिक्षक बन्ने भएका छन्। ३६ वर्ष ९८ दिन उमेर भएका हड्सनले यसअघि सन् १९९५मा नाइजेरियाका प्रशिक्षक शैबू अमोदुले राखेको किर्तिमान तोड्न लागेका हुन्। उनि ३६ वर्ष २ सय ६३ दिनका थिए।
चिलीको राष्ट्रिय टोलीको औसत उमेर २९ वर्ष १ महिना रहेको छ जुन प्रतियोगिता इतिहासकै सबैभन्दा बढी हो। यता जर्मनीले भने २४ वर्ष ४ महिना औसत उमेर भएको टोलीलाई रसियामा उतार्दैछ।
न्युजिल्याण्डका डेन इङघम जारी प्रतियोगिताकै सबैभन्दा कम उमेरका खेलाडी हुन्। उनि भर्खर १८ वर्षका भए। सन् २००९मा न्युजिल्याण्डकै क्रिस वुडले १७ वर्षको उमेरमा खेल्दै इतिहास कायम गरेका छन्।
मेक्सिकोले सातौंपटक कन्फेडेरेसन कपमा सहभागिता जनाउदै छ। मेक्सिकोसँगै ब्राजिलले पनि ७ पटक सहभागिता जनाएको छ। मेक्सिको जारी प्रतियोगितामा यसअघि उपाधि जितेको एकमात्र टोली हो।
ब्राजिलले कन्फेडेरेसन कपको उपाधि कीर्तिमानी ४ पटक जितेको छ। उसले सन् १९९७, २००५, २००९ र २०१३मा उपाधि जित्दै इतिहास कायम गरेको थियो।
यसपाली प्रतियोगितामा ३ युरोपियन टोलीको सहभागिता रहेको छ। एकै संस्करणमा २ भन्दा बढी टोलीको सहभागिता रहेको यो पहिलोपटक हो।
अहिलेसम्म कुनै पनि विदेशी प्रशिक्षक रहेको टोलीले कन्फेडेरेसन कपको उपाधि जित्न सकेको छैन। यसपाली दावेदार मानिएका पोर्चुगल र जर्मनीको प्रशिक्षक स्वदेशीनै रहेका छन्।
