एजेन्सी – युभेन्टस एवं ब्राजिलको राष्ट्रिय टोलीका फुलब्याक ड्यानी आल्भेस इटालीयन क्लब छाडेर इङ्गलिस प्रिमियर लिग आउने भएका छन्। बार्सिलोनाका पूर्वखेलाडी आल्भेस २ सिजन अघिमात्र युभेन्टस पुगेका थिए।
प्रिमियर लिग क्लब म्यानचेस्टर सिटी उनको नयाँ गन्तव्य हुने भएको छ। प्रशिक्षक पेप गुआर्डिओलाले पुन: आल्भेसलाई आफ्नो टोलीमा अनुबन्धन गर्न चाहेका हुन्। यसअघि यी दुईले बार्सिलोनामा पनि सँगै रहेर काम गरेका थिए। आल्भेसलाई सिटिले २ वर्षको अनुबन्धनमा राख्ने बुझिएको छ।
यद्दपी चेल्सीका प्रशिक्षक एन्टोनियो कोन्टेले पनि आल्भेसलाई चेल्सीमा भित्र्याउन प्रयास गरेका छन्। गत सिजन मिडफिल्डर भिक्टर मोसेसलाई फुलब्याक पोजिसनमा खेलाएका उनले यसपाली भने प्राकृतिक रुपमै त्यस ठाउँमा खेल्ने खेलाडी खोजिरहेका छन्।
आल्भेसले युभेन्टससँग आफुले क्लब छाड्नेबारे कुरा गरिसकेको र छिट्टै क्लबले त्यसबारे सार्वजनिक विज्ञप्ति जारी गर्ने सम्भावना रहेको छ। उनले सिटीसँग मौखिक सम्झौता गरिसकेका छन् जसअन्तर्गत उनले अहिले युभेन्टसमा पाएको भन्दा केहि बढि तलब पाउनेछन्।
