एजेन्सी – फिफा कन्फेडेरेसन कप अन्तर्गत समूह चरणको दोश्रो खेलमा पोर्चुगलले आयोजक रसियाको सामना गर्दैछ। पहिलो खेलमा मेक्सिकोसँग २-२को बराबरी खेलेको पोर्चुगलले समूहको शीर्षस्थानमा रहेको रसियालाई हराउँदै पहिलो जित हात पार्ने सोच हुनेछ।
पोर्चुगलका कप्तान क्रिस्टियानो रोनाल्डो पहिलो खेलमा ‘म्यान अफ द म्याच’ भएपनि उनको प्रदर्शनको आलोचना भएको थियो। पहिलो गोलमा असिस्ट उपलब्ध गराएका रोनाल्डोले केहि मौका गुमाएका थिए। प्रशिक्षक फर्नान्डो सान्टोसले खेलको अघिल्लो दिन पत्रकारसँग बोल्दै रोनाल्डो टोलीको उत्कृष्ट प्रदर्शनको लागि केन्द्रित रहेको बताए।
“हामीले भोलि निकै महत्त्वपूर्ण खेल खेल्दै छौं। सबै खेलाडीहरु आफ्नो कप्तानजस्तै खेलको लागि केन्द्रित रहेका छन्। हामी राम्रो प्रदर्शन गर्नेछौँ भन्नेमा म विश्वस्त छु।”
डिफेन्डर पेपेले पनि टोली खेलमा आफ्नो उत्कृष्ट प्रदर्शन गर्नेमा विश्वस्त रहेको बताए। उनले पोर्चुगल यस्तो प्रतियोगितामा पहिलो सहभागिता रहेको र सकेसम्म राम्रो प्रदर्शन गर्ने धुनमा रहेको बताए।
पोर्चुगल र रसियाबिचको खेल रातको ८:४५ बजे सुरु हुनेछ।
