एजेन्सी – यू-२१ युरो च्याम्पियनसिप अन्तर्गत बुधबार राती भएको समूह ‘सी’को खेलमा चेक गणतन्त्रले इटालीलाई ३-१ले पराजित गरेको छ।
तुलनात्मक रुपमा खेलमा केहि बलियो पकड बनाएपनि अवसरहरुको सदुपयोग गर्न नसक्दा इटालीले समूह चरणमा हार व्यहोर्नुपरेको हो। खेलको २३औं मिनेटमा माइकल ट्राभ्निकले गोल गर्दै चेकलाई अग्रता दिलाएका थिए। तर, दोश्रो हाफको ७०औं मिनेटमा डोमेनिको बेरार्डीले गोल गर्दै इटालीलाई बराबरीमा ल्याए।
खेलको ७९औं मिनेटमा मारेक हाभ्लिकले गोल गर्दै चेकलाई पुन: अग्रता दिलाएका थिए। त्यसको ५ मिनेटमै माइकल लुफ्टनरले गोल गर्दै चेकको जित पक्का गरेका थिए। एसी मिलानका गोलरक्षक जियानलुइजी डोनारुम्माले आशातीत प्रदर्शन गर्न नसकेपछि इटालीले नतिजा सुम्पनु परेको थियो।
यस नतिजासँगै इटाली र चेकको समान ३/३ अंक भएको छ। समूहको अन्तिम खेलमा इटालीले जर्मनीको सामना गर्दैछ भने चेकले डेनमार्कसँग खेल्नेछ।
