एजेन्सी – फिफा कन्फेडेरेसन कप अन्तर्गत बिहिबार रातीको खेलमा अष्ट्रेलिया र क्यामरुनले १-१को बराबरी खेल्दै जारि प्रतियोगितामा खाता खोलेका छन्। समूह ‘बी’को पहिलो खेलमा पराजित दुई टोलीबीचको खेलमा दुवै हाफमा १/१ गोल भएको थियो।
क्यामरुनका आन्द्रे अंगुइस्साले खेलको ४५औं मिनेटमा गोल गर्दै टोलीलाई अग्रता दिलाएका थिए। पहिलो हाफमा पछाडी परेको अष्ट्रेलियाले ६०औं मिनेटमा खेल बराबरीमा ल्याएको थियो। मार्क मिलिगनले पेनाल्टीमार्फत गोल गर्दै टोलीलाई खेलमा फर्काएका थिए।
दुवै टोलीबाट थप गोल हुन नसकेपछि खेल बराबरीमा टुंगिएको थियो। अंक तालिकामा दुवै टोलीले समान १/१ अंक जोडेका छन्। दुवै टोलीले अर्को चरणमा पुग्ने सम्भावना जिवितै राख्न अर्को खेलमा जित हासिल गर्नैपर्ने दबाव रहेको छ। समूहको अन्तिम खेलमा अष्ट्रेलियाले चिलीसँग खेल्दैछ भने क्यामरुनले जर्मनीको सामना गर्नेछ।
