एजेन्सी – आयोजक पोल्याण्डलाई पराजित गर्दै इङ्गल्याण्ड युरोपेली यू-२१ च्याम्पियनसिपको सेमिफाइनलमा प्रवेश गरेको छ। बिहिबार राती भएको समूह ‘ए’को खेलमा इङ्गल्याण्डले ३-०को जित हात पारेको हो।
लेस्टर सिटिबाट व्यवसायिक फुटबल खेल्दै आएका डेमारे ग्रेले छैटौं मिनेटमा गोल गर्दै टोलीलाई अग्रता दिलाएका थिए। जेकब मर्फीले ६९औं मिनेटमा दोश्रो गोल गरेका थिए।
पोल्याण्डका डिफेन्डर बेड्नारेकले ट्यामी अब्राहमलाई बक्स भित्र लडाएपछि इङ्गल्याण्डले पेनाल्टि पाएको थियो। लेविस बेकरले ८२औं मिनेटमा पेनाल्टिबाट गोल गर्दै जित सुनिश्चित पारेका थिए।
३ खेलमा ७ अंक जोडेको इङ्गल्याण्डले समूह विजेता बन्दै सन् २००९ पछि पहिलोपटक सेमीफाइनलमा स्थान बनाएको हो। समूहकै अर्को खेलमा स्लोभाकियाले स्विडेनलाई ३-०ले पराजित गर्यो। प्रतियोगिताको साविक विजेता स्विडेन यस हारसँगै प्रतियोगिताबाट बाहिरीएको छ।
