एजेन्सी – रियल म्याड्रिड एवं लिभरपुलका पूर्वखेलाडी अल्भारो आर्बेलोआले व्यवसायिक फुटबलबाट सन्न्यास लिएका छन्। स्पेनको राष्ट्रिय टोलीबाट खेल्दै सन् २०१०मा विश्वकप विजेता बनेका आर्बेलोआले गत सिजन इङ्गल्याण्डको वेष्ट ह्याम युनाइटेडबाट खेलेका थिए।
राइट ब्याक पोजिसनबाट खेल्ने आर्बेलोआले स्पेनको राष्ट्रिय टोलीबाट ५८ पटक खेल्दै एकपटक विश्वकप उपाधि र दुइपटक युरोपेली च्याम्पियनसिप जितेका छन्। आफ्नो व्यवसायिक खेलजीवनको अधिकांश समय रियल म्याड्रिडमा खेलेका आर्बेलोआले दुइपटक युरोपेली च्याम्पियन्स लिग पनि जितेका थिए। उनले स्पेनिस ला लिगाको उपाधि पनि हात पारे।
इङ्लिस क्लब लिभरपुलमा २ सिजन बिताएका आर्बेलोआले ६६ खेल खेल्दै २ गोल गरेका थिए। तर गत सिजन वेष्ट ह्याम आएपछि ४ खेलमा मात्र सहभागिता जनाएसँगै उनले सन्न्यास लिने निर्णय गरेका हुन्।
उनले आफुले खेलजीवनबाट सन्न्यास लिएपनि फुटबलबाट भने टाढा नहुने बताएका छन्। आर्बेलोआ निकट भविष्यमा व्यवस्थापनको सदस्यका रुपमा रियल म्याड्रिडमा पुन: आवद्ध हुने हल्ला रहेको छ।
