काठमाडौँ, फागुन ६
१२ औँ दक्षिण एसियाली खेलकुद सागको पुरुष फुटबलमा स्वर्ण विजेता टोलीलाई सरकारले जनही पाँच लाख पुरस्कार दिने घोषणा गरेको छ । विजेता टोलीमा २० खेलाडी र तीन पदाधिकारी छन् ।
अखिल नेपाल फुटबल सङ्घ (एन्फा)ले दशरथ रङ्गशालामा बुधबार आयोजना गरेको कार्यक्रममा युवा तथा खेलकुद मन्त्री सत्यनारायण मण्डलले नगद पुरस्कारको घोषणा गरेको हो ।
यसअघि सरकारले टिम इभेन्टमा स्वर्ण जिते जनही दुइ लाख र व्यक्तिगत स्पर्धामा स्वर्ण जिते जनही ५ लाख दिने घोषणा गरेको थियो।
सागमा पुरुष फुटबल टिमसहित उसुबाट निमा घर्तीमगर र जुडोबाट फुपु ल्हामु खत्रीले नेपाललाई स्वर्णपदक दिलाएको थियो ।
