काठमाडौं (हाम्रो खेलकुद) – नेपाल पुलिस क्लब र भ्याली च्यासल युवा क्लबले लिगको सरुवातमा आफूलाई उपाधि दावेदारको रुपमा प्रस्तुत गरेका थिए । कागजमा हेर्दा दुवै टोली बलिया पनि छन् । तर नतिजा त्यसअनुसार आउन सकेको छैन ।

लिगको ३ खेल सकिँदा पुलिस र च्यासल दुवैले १ जित, १ बराबर र १ हार बेहोरेका छन् । दुवै क्लबले मछिन्द्रविरुद्ध गोलरहित बराबरी खेलेका थिए भने आफूभन्दा कमजोर प्रतिद्वन्द्वीलाई पराजित गरेका थिए । पुलिसले पहिलो खेलमा जावलाखेललाई १-० ले हराएको थियो । यता च्यासल पछिल्लो खेलमा एनआरटीविरुद्ध ५-१ ले विजयी रहयो । दुवै टोली आर्मीसँग १-० ले पराजित भएका छन् ।

पुलिसको टोलीमा आक्रमणमा राम्रा खेलाडीको उपस्थिति भएपनि त्यसअनुसार नतिजा भने निस्केको छैन । राष्ट्रिय टोलीको क्याम्पमा नियमित रहेका खेलाडीहरुले पुलिसको प्रदर्शनमा जोड दिन सकेका छैनन् । सुमन लामा, अभिषेक रिजाल, तेज तामाङ र रवी पासवानले अपेक्षाकृत प्रदर्शन गर्न सकेका छैनन् । डिफेन्समा भने औसत खेलाडी भएपनि प्रदर्शन राम्रो रहेको छ । उपाधि होडमा फर्कने हो भने पुलिसलाई यस खेलमा जित अत्यावश्यक रहेको छ ।

यता च्यासलले पनि राष्ट्रिय खेलाडीहरुलाई अनुबन्ध गरेको छ । विमल घर्तिमगर, देवेन्द्र तामाङ, हेमन्त थापामगर जस्ता खेलाडीलाई सन्तोष साहुखल, सन्जोग राई, विश्व अधिकारी लगायतले साथ दिइरहेका छन् । विदेशी डिफेन्डरका रुपमा फ्लोरेन्टको आगमनले पनि च्यासलको डिफेन्स थप सशक्त भएको छ । पछिल्लो खेलमा एनआरटीविरुद्ध च्यासलले उत्कृष्ट प्रदर्शन गरेको थियो । त्यसलाई निरन्तरता दिए च्यासल उपाधि होडमा फर्कनेछ ।

खेल हल्चोकस्थित एपीएफ मैदानमा दिउँसो २:३० बजे हुनेछ ।