काठमाडौं (हाम्रो खेलकुद) – पहिलो हाफमा पछाडी परेको अवस्थाबाट दोस्रो हाफमा पुनरागमन गर्दै भ्याली च्यासल युवा क्लबले हिमालयन शेर्पा क्लबलई २-१ ले परााजित गरेकाे छ । पल्सर सहिद स्मारक ए डिभिजन लिग अन्तर्गत बुधबार च्यासलको जितमा म्यान अफ द म्याच सन्तोष साहुखलले उत्कृष्ट प्रदर्शन गरे ।

खेलको पहिलो मिनेटमै गाेलरक्षक दिनेश थापामगरले क्लियर गरेकाे बलमा पहिलाे मिनेटमा च्यासलका सन्ताेष साहुखलकाे प्रहार गाेलरक्षक किशोर गिरीले बचाएका थिए । १३ औं  मिनेटमा सन्ताेषकाे पासमा सन्त बहादुर गुरुङकाे फितलाे प्रहारले गोलरक्षकलाई कठिन समय दिन सकेन ।

च्यासलले लगातार आक्रमण बुनेपनि काउन्टर अट्याकमा १५ अाैं मिनेटमा हिमालयन शेर्पाले अग्रता लियो । त्रिदेव गुरुङकाे गाेलमा शेर्पा अगाडी बढेको थियो । च्यासलका खेलाडीले अफसाइड भनेर छाेडेकाे बलमा फरवार्ड कर्ण लिम्बूको प्रहार पोस्टमा लागेर फर्किएपछि त्रिदेवले रिबाउन्डमा गाेल गरेका थिए  ।

३० अाैं मिनेटमा हेमन्त थापामगरकाे ३० यार्ड टाढाकाे प्रहार बारमा लागेर बाहिरिंदा च्यासलले खेलमा फर्कने मौका गुमाएको थियो  । ४० औं मिनेटमा अमिर श्रेष्ठकाे पासमा सन्ताेषकाे बक्सभित्रकाे हेडर गाेलरक्षकबाट बचाउ ।

दोस्रो हाफमा च्यासलले फिनिसिङमा सुधार गर्दै उत्कृष्ट पुनरागमन गर्यो । ५६अाैं मिनेटमा एकल प्रयासमा सन्ताेस साहुखलले गोल गरे । उनले पेनाल्टी क्षेत्रभित्र दुई डिफेन्डरको बिचमा रहेको अवस्थामा गरेको प्रहारलाई किशोर गिरीले बचाउन सकेनन् ।

खेलको ७३ अाैं मिनेटमा च्यासलले अग्रता बनायो । वैकल्पिक खेलाडी सुनिल खड्काकाे प्रहार निरज बस्नेतलाई लाग्दै गोलमा परिणत भएपछि च्यासलले अग्रता लिएको थियो । अन्तिम समयसम्म थप गोल हुन नसक्दा च्यासलले दोस्रो जित दर्ता गर्यो ।

यस जितसँगै च्यासलले ६ खेलमा २ जित, १ बराबर र ३ हारसहित ७ अंक जोडेको छ । अंक तालिकामा च्यासल सातौं स्थानमा छ । शेर्पा भने ६ खेलमा ३ जित, १ बराबर र २ हारसँगै १० अंक जोड्दै छैटौं स्थानमा छ ।