काठमाडौं, चैत १६
नेपाल पत्रकार महासंघको ६१ औं स्थापना दिवसको उपलक्ष्य पारेर बुधबार सञ्चारकर्मी र राजनीतिकर्मीबीच मैत्रीपूर्ण फुटबल खेल हुने भएको छ । स्थापना दिवसको उपलक्ष्यमा महासंघले गत बर्षदेखि मैत्रीपूर्ण खेल आयोजनाको सुरुआत गरेको थियो ।
सञ्चारकर्मी टोलीको नेतृत्व नेपाल पत्रकार महासंघका अध्यक्ष डा. महेन्द्र विष्टले तथा राजनीतिकर्मीको नेतृत्व सुचना तथा सञ्चारमन्त्री शेरधन राईले गर्नुहुनेछ । राजनीतिकर्मीको टोलीमा युवा तथा खेलकुद मन्त्री सत्यनारायण मंडल, राज्यमन्त्री कुन्ती शाही, कांग्रेस नेता डा. मिनेन्द्र रिजाल, गगन थापा, रामहरि खतिवडा, गुरुराज घिमिरे, उदय शम्सेर राणा, राजीवविक्रम शाह, प्रदीप पौडेल एमालेका रामकुमारी झाक्री, जीवनराम श्रेष्ठ, विशाल भट्टराई, अनेरास्वयु अध्यक्ष नवीना लामा, युवा संघका अध्यक्ष राजीव पहारी, राप्रपा नेपालका मोहन श्रेष्ठ, नयाँ शक्तिका गंगा श्रेष्ठ खेल्नेछन् ।
त्यस्तै विष्टको नेतृत्वमा रहने टोलीमा महासंघका पदाधिकारी, सदस्य, जिल्ला शाखा, प्रतिष्ठान, एसोसिएट सदस्य र अन्य सञ्चारकर्मीको सहभागिता रहनेछ । महासंघले स्थापना दिवसको अवसरमा मंगलबार प्रभात फेरी आयोजना गरेको थियो भृकुटिमण्डपदेखि सुरु भएको ¥याली शान्तिबाटिका सम्म पुगेर टुंगिएको थियो ।
