काठमाडौं (हाम्रो खेलकुद) – अखिल नेपाल फुटबल संघ (एन्फा) को आयोजनामा असोज महिनादेखि सुरु भएको बिना रेलिगेसनको पल्सर सहिद स्मारक ए डिभिजन लिग फुटबल प्रतियोगिताको अन्तिम चरण शनिबारदेखि सुरु हुँदैछ ।

लिगको उपाधि मनाङ मर्स्याङदीले जित्ने पक्का भइसकेको छ । संकटाले पनि पछिल्लो चरणमा रुस्लान थ्री स्टारलाई पराजित गर्दै लिग उपविजेतामा आफ्नो स्थान पक्का गरेको छ । अन्य स्थानको टुङ्गो लाग्न भने अन्तिम चरणका खेल समाप्त हुनुपर्नेछ । लिगमा क्लबहरुको स्थानसँगै अब व्यक्तिगत विधातर्फको उपाधि पनि कसले जित्छ भन्ने कौतुहलता सुरु भएको छ ।

यसपटक लिगमा उत्कृष्ट प्रदर्शन गरेका उत्कृष्ट गोलरक्षकको उपाधिका दावेदार निम्नानुसार छन् :

गोलरक्षक:

विशाल श्रेष्ठ (मनाङ मर्स्याङदी क्लब) :

खेल – १२

क्लिन सिट – ६

गोल खाएको – ६

विशाल श्रेष्ठ मनाङ मर्स्याङदीको उपाधि यात्रामा ‘साइलेन्ट हिरो’ यानकी ‘शान्त नायक’ बन्दै आएका छन् । मनाङको कसिलो डिफेन्सको महत्त्वपूर्ण पाटो बनेका विशालकै प्रदर्शनमा मनाङले रक्षात्मक रुपमा बलियो प्रदर्शन गरेको छ । मिडफिल्ड र अग्रपंक्तिबाट सोचेअनुरुप प्रदर्शन हुन नसक्दा विशालले मनाङको रक्षात्मक पाटोलाई सुदृढ बनाएका छन् ।

लामो समय मनाङबाट बाहिर रहेका विशाल अघिल्लोपटक ए डिभिजन जित्दा पनि टोलीका सदस्य थिए । उनले त्यसबेला उत्कृष्ट गोलरक्षक उपाधि जितेका थिए । राष्ट्रिय टोलीको अन्तिम टोलीमा पर्न चुकेका विशालले जारी लिगमा बलियो प्रदर्शन गर्दै आफ्नो स्तर देखाएका छन् । उनले खेलेका १२ मध्ये ६ खेलमा कुनै गोल खाएका छैनन् । उनले कुनैपनि खेलमा १ भन्दा बढी गोल खाएका छैनन् । विशेषगरि विशालले लिगको टर्निङ पोइन्ट मानिएको रुस्लान थ्री स्टारविरुद्ध उत्कृष्ट प्रदर्शन गरेका थिए ।

विकेश कुथु (त्रिभुवन आर्मी क्लब) :

खेल – १२

क्लिन सिट – ६

गोल खाएको – ८

म्यान अफ द म्याच – १ (विरुद्ध च्यासल युवा क्लब)

त्रिभुवन आर्मी क्लबको प्रदर्शन यस सिजन उतारचढावले भरिपूर्ण रहयो । बल पोसेसन राखेपनि फिनीसिङमा चुक्दा आर्मीले निकै अंक गुमाउनु पर्यो । रक्षापंक्तिमा नियमित रुपमा समस्या देखिएपनि विकेशले पटक पटक आर्मीलाई अंक गुम्नबाट जोगाए । तर आर्मीको अग्रपंक्ति अस्थिर रहँदा लिगमा सोचेअनुरुप नतिजा आउन सकेन ।

विकेशले च्यासल युवा क्लबविरुद्ध म्यान अफ द म्याच भए भने अन्य खेलमा पनि महत्त्वपूर्ण बचाउ गरे । त्यस खेलमा च्यासलका आधा दर्जन बचाउ गरेका उनले शानदार प्रदर्शन गरेका थिए । सन्तोष साहुखल र विमल घर्तीमगरको लगातार आक्रमण निस्तेज पारेका उनले आर्मीको जित सुनिश्चित पारेका थिए । उनले खेलेका १२ खेलमध्य ६ खेलमा कुनै गोल खाएका छैनन् ।

अन्य राम्रो प्रदर्शन गर्ने खेलाडी :

संकटाका राजबाबु थापाले पनि राम्रो प्रदर्शन गरेका छन् । यद्यपी मुख्य खेलहरुमा उनको गल्तिले संकटाले उपाधि दौडबाट बिदा लिनु पर्यो । उनकै गल्तीमा संकटाले अनावश्यक गोल पनि खायो ।

फ्रेन्ड्सका देवराज लिम्बूले पनि लिगमा राम्रो प्रदर्शन गरे । बंगलादेशका नुरुल करीमलाई पहिलो रोजाईमा राख्दा बेन्चमा रहेका उनले राम्रो प्रदर्शन गरेपछि नै फ्रेन्ड्सले लगातार नतिजा हात पार्न सकेको थियो ।

न्यू रोड टिम (एनआरटी) का अजित प्रजापतिले पनि उत्कृष्ट प्रदर्शन गरे । एनआरटीले अर्का गोलरक्षक सोजित गुरुङलाई खेलाउँदा भारी अन्तरले पराजित हुँदा अजितको उपस्थितिमा भने निकै कम अन्तरको पराजय र उत्कृष्ट गोलरक्षण देखिएको थियो ।

सरस्वतीका प्रदिप भण्डारीले दुई म्यान अफ द म्याच पाएपनि निरन्तर राम्रो प्रदर्शन भने गर्न सकेनन् ।