दीपेन्द्र पोखरेल
काठमाडौ – फिफाको अपिल कमिटीले अखिल नेपाल फुटबल संघ(एन्फा) अध्यक्ष गणेश थापाको अपिललाई शुक्रबार पूर्ण रुपमा खारेज गरेको छ । फिफाको आधिकारिक वेभसाइटले थापाको अपिल खारेज गरेको उल्लेख गरेको छ । फिफाको इथिक्स कमिटिले कात्तिक २९ भ्रष्टाचारको आरोपमा थापालाई १० बर्षको प्रतिबन्ध लाउँदै झन्डै २१ लाख रुपैयाँ जरिवाना तोकेको थियो । उनले आफुमाथिको प्रतिबन्ध र कारवाहीविरुद्ध अपिल गरेका थिए । फुटबलमा फर्कने थापाको चाहना तत्कालका लागि टरेको छ । अब थापासँग कोर्ट अफ आर्बिटेसन फर स्पोर्ट (सिएएस) जाने बाहेकको विकल्प छैन ।

सन् २००९ र २०११ मा भएको फिफा कार्यसमिति निर्वाचनमा एसियाली प्रतिनिधि छान्ने क्रममा थापाले ठूलो रकम घुसका रूपमा लिएको बताएको थियो ।
दुई दशक नेपाली नेपाली फुटबलको नेतृत्व गरेका थापाले व्यक्तिगत र पारिवारिक रूपमा ठूलो रकम अन्य देशका फुटबल अधिकारीसँग लिएको खुलेको कारवाहीको निर्णय सार्वजनिक गर्ने क्रममा फिफाले उल्लेख गरेको थियो ।
भ्रष्टाचारको अभियोगमा आजीवन प्रतिबन्धमा रहका एएफसीका पूर्वअध्यक्ष मोहम्मद बिन हमामसँग थापाले १ लाख डलर लिएको २०१२ को जुनमा सार्वजनिक भएको थियो । हमाममाथि फिफाले अनुसन्धान गर्ने क्रममा एएफसीमा कार्यरत थापा छोरा गौरवको खातामा हमामले १ लाख डलर जम्मा गरिदिएको खुलेपछि थापामाथि अनुसन्धान सुरु भएको थियो । अनुसन्धानका क्रममा थापाले २०१० मै हमामसँग थप १ लाख १५ हजार पाउन्ड पनि लिएको गत दुई बर्ष अघि सर्वजनिक भएको थियो । थापाले हमामसँको रकम व्यापारिक हिसाबले दाबी गर्दै आएका थिए ।
एन्फाका उपाध्यक्ष कर्माछिरिङ शेर्पाको नेतृत्वमा देश भित्र दुई बर्षअघि चलेको आन्दोलनले थापलाई केही संकट परेपनि अख्तियार दुरुपयोग अनुसन्धानले भने उनीमाथिको छानविनलाई तामेलिमा राखेको थियो ।
सार्वजनिक लेखा समितिले २०७१ को असोज १३ गते ५८ करोड रुपैयाँ भ्रष्टाचार गरेको ठहर गर्दै थापामाथि थप अनुसन्धान गरी कारबाही प्रक्रिया अघि बढाउन अख्तियारलाई निर्देशन दिएको थियो । तर, अख्तियारले त्यही वर्ष थापाविरुद्धको मुद्दा तामेलीमा राख्दै उनलाई एन्फा फर्कने बाटो खुला गरेको थियो । तर, एएफसीका पूर्व उपाध्यक्ष रहेका थापालाई फुटबलमा फर्कने प्रयासलाई फिफाको अपिल कमिटिको निर्णयले अंकुश लागेको छ ।