एजेन्सी – युइएफए च्याम्पियन्स लिगअन्तर्गत प्रि–क्वाटरफाइनलको दोस्रो लेगमा डिफेन्डिङ च्याम्पियन स्पेनिस क्लब रियल मड्रिडले नेदरल्यान्डको आयाक्सको आतिथ्यता गर्दैछ ।

खेल नेपाली समयअनुसार आज राति १ः४५ बजे रियलको घरेलु मैदान सान्टियागो बर्नबेउमा हुदैछ गर्दैछ । घरेलु टोली रियल पहिलो लेगमा पाएको २–१ को जितलाई निरन्तरता दिने अभियानमा मैदान उत्रनेछ । तर, पहिलो लेगको खेलमा भिएआर विवाद चुलिएको थियो । पहिलो लेगमा करिम बेन्जेमा र मार्काे एसेन्सियोले गोल गरेका थिए ।

साविकको विजेता रियल आयाक्सलाई पराजित गर्दै क्वाटरफाइनल प्रवेश गर्ने योजनामा हुनेछ । रियलले आयाक्ससँगको सबै ७ भेटमा जित निकालेको छ । यही जितलाई निरन्तरता दिने लक्ष्यमा रियल हुनेछ । रियलमा फरवार्ड करिम बेन्जेमा, भिनिसियस जुनियर, लुका मोड्रिच, टोनी क्रुस, क्यासमिरो र ग्यारेथ बेल लगायतका खेलाडीले लगातार उच्च प्रदर्शन गरिरहेका छन् ।

तर, पछिल्लो पाँच खेलमा रियलको प्रदर्शन राम्रो हुन सकेको छैन । रियलले २ खेलमा जित हात पार्दा तीन खेलमा हार बेहोरेको छ । दुई खेल बार्सिलोनासँग र एक खेल जिरोनासँग भोगेको थियो । त्यही हारको पीडा रियलले आयाक्समाथि पोख्नेछ ।

यता, नेदरल्यान्डको लिगमा मिश्रित प्रदर्शन गरेको आयाक्स रियललाई उसकै मैदानमा पराजित गर्ने लक्ष्यमा मैदान उत्रनेछ । आयाक्सलाई अघिल्लो चरण पुग्न रियल विरुद्ध ३–० को निश्चित जितको खाँचो छ । तर, घरेलु मैदानमा बलियो रियलविरुद्ध असम्भव नै छ ।

पछिल्लो तीन खेलको नतिजा हेर्ने हो भने आयाक्सले रियललाई पराजित गर्न सक्ने क्षमता राख्दछ । सेन्टर ब्याक तथा कप्तान सर्जियो रामोस प्रतिबन्धमा रहनुले पनि आयाक्सले फाइदा उठाउन सक्दछ । बराबरीले पनि रियल अघिल्लो चरण पुग्नेछ । आयाक्सलाई निश्चित जित आवश्यक छ ।