काठमाडौं (हाम्रो खेलकुद) – नेपाली यु–१९ राष्ट्रिय टोलीले म्यानमारमा जारी एएफसी यु–१९ महिला च्याम्पियनसिपको दोस्रो चरणको छनोटको समुह चरणको अन्तिम खेलमा आयोजक म्यानमारसँग प्रतिस्पर्धा गर्दैछ ।

खेल म्यानमारको मण्डलर थिरी स्टेडियममा नेपाली समय अनुसार साझ ६:१५ बजेपछि शुरु हुनेछ । दोस्रो चरणको सुरुवाती दुवै गुमाएर छनोटबाट बाहिरीसकेको नेपाल घरेलु टोली म्यानमारविरुद्ध सान्त्वना जितको खोजीमा मैदान उत्रनेछ । म्यानमारलाई पराजित गर्दै नेपाल छनोटको सुखद अन्त्य गर्न चाहन्छ । तर, बलियो म्यानमारविरुद्ध नेपाललाई त्यति सजिलो भने छैन ।

नेपाल समूहको पहिलो खेलमा बलियो अष्ट्रेलियासँग ११–१ ले तथा उज्वेकिस्तानसँग ४–० ले पराजित हुदै दोस्रो चरणको छनोटबाटै बाहिरिएको थियो । अष्ट्रेलियाविरुद्धको खेलमा नेपालकी मन्जली कुमारी योन्जनले गोल गरेकी थिइन् । नेपाल समूह ‘ए’ मा अंकविहीन हुदै पुछारमा छ ।

यता, म्यानमार नेपाललाई पराजित गर्दै अघिल्लो चरणको यात्रालाई बलियो बनाउने योजनामा हुनेछ । म्यानमार समूहमा ३ अंक जोडेर दोस्रो स्थानमा रहेको छ । समान ३ अंक नै भएपनि म्यानमारले उज्वेकिस्तानलाई गोल अन्तरमा पछि पारेको छ । आजै अष्ट्रेलिया र उज्वेकिस्तान खेल्दैछन् । यो खेलमा जित हात पारे वा बराबरीको नतिजा निकालेको अवस्थामा अष्ट्रेलिया समूह विजेताको रुपमा अघि बढ्नेछ ।

यता, उज्वेकिस्तानलाई अघिल्लो चरण प्रवेश गर्न निश्चित जित आवश्यक र नेपाल र म्यानमारबीचको खेलको नतिजा कुर्नुपर्ने हुन्छ । अष्ट्रेलियाविरुद्ध जित निकालेको अवस्थामा म्यानमार नेपालसँग पराजित भए उज्वेकिस्तान अघिल्लो चरणमा प्रवेश गर्नेछ । उज्वेकिस्तान र म्यानमार दुवैले जित निकालेको खण्डमा म्यानमार हेड टु हेडमा दोस्रो चरणमा प्रवेश गर्नेछ । त्यसैले म्यानमारलाई फाइनल चरणमा स्थान बनाउन नेपालविरुद्ध निश्चित जितको खाँचो छ ।