काठमाडौं (हाम्रो खेलकुद) – कैलालीको गोदावरी नगरपालिका २ तेघरीमा सम्पन्न प्रथम बि वाइ सी मेयर कप राष्ट्रिय फुटबल प्रतियोगिताको उपाधि खजुरा गाँउपालिका बाँकेले जितेको छ ।

तेघरीस्थित बनदेवी युवा क्लबको खेल मैदानमा आज भएको फाइनल खेलमा भजनी नगरपालिका कैलालीलाई पराजित गर्दै उपाधि माथि खजुरा गाउपालिकाले कब्जा जमाएको हो । खजुरा १–० गोल अन्तरले विजयी भएको हो । प्रतियोगिताको विजेता भएसंगै खजुरा गाउपालिकाले ३ लाख रुपैयाँ र उपविजेता भजनीले १ लाख ५० हजार प्राप्त गरे ।

खजुराको जितमा दिपकराज सिंह ठकुरीले गरेको गोल नै निर्णायक बन्यो । खेलको म्यान अफ द म्याच समेत बनेका दिपकराजले ३ हजार रुपैयाँ पाए । प्रतियोगिता कै सर्वाधिक गोलकर्ता पनि बनेका दिपकराज ले १० हजार रुपियाँ प्राप्त गरे ।

अन्य विधामा उदयमान खेलाडी गोदावरी नगरपालिका टिम बी का योगेन्द्र खड्का , उत्कृष्ट गोल किपर खजुराका सुजित बि.क , उत्कृष्ट डिफेन्डर भजनी नगरपालिका सुनिल धामी घोषित हुदै समान १०-१० हजार नगद प्राप्त गरे । यस्तै प्रतियोगिताको सर्वोत्कृष्ट खेलाडी खजुराका विजयसिंह ठकुरी घोषित हुदै नगद १५ हजार प्राप्त गरे भने उत्कृष्ट कोच खजुराका र फेयर प्ले टिम लम्की चुहा नगरपालिका घोषित भएको प्रतियोगिताका संयोजक एबम् क्लबका उपाध्यक्ष प्रकाश शाहीले जानकारी दिए ।

समापन कार्यक्रमका प्रमुख अतिथी गोदावरी नगरपालिकाका नगरप्रमुख हरि सिंह साउद र बिशिष्ट अथिती गो.न.पा २ का वडा अध्यक्ष कृष्ण राज जोशीले विजेतालाई पुरस्कृत गरे । बनदेवी युवा क्लब तेघरीको आयोजनामा यहि बैशाख १० गतेवाट सुरु भएको सो प्रतियोगितामा देशैभरवाट गाउपालिका , नगरपालिका र उपमहानगरपालिका गरी जम्मा १० टिमको सहभागिता रहेको थियो । खेलहरु नकाउट चरणका आधारमा खेलाइएको थियो ।