एजेन्सी – इटालियन फरवार्ड मारियो बालोटेलीले बार्सिलोनाका कप्तान लियोनेल मेस्सीको तुलना युभेन्टस फरवार्ड क्रिस्टियानो रोनाल्डोसँग नगर्न भनेका छन् ।

यसअघि लिभरपुलबाट पनि खेलिसकेका फरवार्ड बालोटेलीले बुधबार मेस्सीले च्याम्पियन्स लिगको सेमिफाइनलमा उत्कृष्ट प्रदर्शन गरेपछि यस्तो अभिव्यक्ति दिएका हुन् । उनले खेलको तस्बिर राख्दै आफ्नो इन्स्टाग्राममा लेखेका छन्,’ फुटबललाई माया गर्नुहुन्छ भने मेस्सीको तुलनामा युभेन्टसमा ७ नम्बर जर्सी लगाउनेसँग नगर्नुहोस् ।’

मेस्सीले लिभरपुलविरुद्ध २ गोल गरेसँगै बार्सिलोनाका लागि ६ सय गोल पूरा गरेका छन् । रोनाल्डोले पनि केहि दिन अघिमात्र मात्र इन्टर मिलानविरुद्ध गोल गर्दै आफ्नो ६ सयौं गोल पूरा गरेका थिए । मेस्सी र रोनाल्डो दुवैले ५-५ पटक ब्यालोन डी’ओर जितेका छन् । दुवै खेलाडीले पछिल्लो एक दशक विश्व फुटबलमा अधिपत्य नै जमाएका छन् ।

बालोटेली हाल फ्रान्सेली क्लब मार्सेबाट व्यावसायिक फुटबल खेलिरहेका छन् । प्रिमियर लिगमा म्यानचेस्टर सिटीबाट लिग उपाधि जितेका बालोटेलीले इन्टर मिलान र एसी मिलानबाट पनि खेलिसकेका छन् । उनले फ्रान्सकै निसबाट पनि खेलेका थिए । बालोटेली सन् २०१२ को युरोपेली च्याम्पियनसिपमा जर्मनीविरुद्ध गोल गरेपछि जर्सी खोलेर गरेको सेलेब्रेसनका कारण चर्चामा आएका थिए ।