नयाँ अध्यक्षका लागि बाटो खुल्यो
काठमाडौं,
फिफाले अखिल नेपाल फुटबल संघ (एन्फा) बाट बर्खास्तमा परेका तीन उपाध्यक्ष र एक सदस्यको पक्षमा निर्णय गर्दै उनीहरुलाई पुर्नबहाली गर्न निर्देशन दिएको छ ।
फिफाका सहायक महासचिव मार्कुस कार्टनरले एन्फा महासचिव धिरेन्द्र प्रदानलाई पत्र लेख्दै निर्वाचित ३ पदाधिकारी र १ सदस्यलाई जेठ १० गते भित्र पुर्नवहाली गर्न र छिटो साधारण सभा गरि त्यसबाट नयाँ अध्यक्षको निर्वाचन गर्न भनेको छ ।
कार्यसमिति बैठकमा लगातार तीन पटक उपस्थित नभएको जनाउँदै असोज ११ गते उपाध्यक्षत्रय कर्मा छिरिङ शेर्पा, विजयनारायण मानन्धर र किरण राई तथा सदस्य पंकज नेम्बाङलाई एन्फाले बर्खास्त गरेको थियो ।
तीन पदाधिकारी र सदस्यले भने गत बर्ष बैंशाखको सुरुआतबाटै बैठकको एन्जेडा माग गर्दै एन्फा बैठक बहिष्कार गर्दै आएका थिए । उनीहरु पछिल्लो साधारण सभाबाट निर्वाचित १७ सदस्य मध्येका हुन् । एन्फाले उनीहरुलाई बर्खास्त गरेकै दिन समिति बाहिरका चार जनालाई मनोनित गरेको थियो ।
फिफाबाट पत्र प्राप्त भएको एन्फा श्रोतले जनाएको छ । कार्यवहाक अध्यक्ष नरेन्द्र श्रेष्ठ, महासचिव प्रधान र सदस्य रमेश रायमाझी फिफा कंग्रेसमा भाग लिन मेक्सिको गएकाले फिफाको निर्देशन कार्यान्वयनमा भने केही समय लाग्ने देखिएको छ ।
एन्फा अध्यक्ष गणेश थापाको अपिल खारेज भएको केहि दिनपछि फिफाले नयाँ निर्वाचन गर्न पनि भनेको छ । दुई साताअघि थापाको उजुरीलाई फिफाको अपिल कमिटीले खारेज गरेको थियो ।
भ्रष्टाचार अभियोगमा आफुमाथि लागेको १० बर्षे प्रतिबन्ध र झन्डै २१ लाख रुपैयाँ जरिवानाविरुद्ध थापाको अपिल वैशाख ११ गते फिफाको अफिल कमिटीले पूर्ण रुपमा खारेज गरेको थियो । फिफाकै एथिक्स कमिटीले कात्तिक २९ गते भ्रष्टाचारको आरोपमा थापालाई सबै खाले फुटबल गतिविधिबाट १० बर्षे प्रतिबन्ध र २१ लाख रुपैयाँ जरिवाना तोकेको थियो ।
थापाले त्यसविरुद्ध अपिल कमिटिीमा उजुरी दिएका थिए । अपिल कमिटीको निर्णले आफुलाई निराश बनाएको जनाउँदै थापाले कोर्ट अफ आर्बिट्रेसन फर स्पोर्टस् (कास) जाने बताएका थिए । तर, त्यो प्रक्रिया समेत नकुरी फिफाले एन्फा अध्यक्षको नयाँ निर्वाचन गराउन भनेको छ ।
