सडन डेथमा सशस्त्र प्रहरी बलको एपिएफलाई हराउँदै आयोजक मदन भण्डारी स्मृति प्रतिष्ठान उर्लाबारीमा जारी पाँचौ मदन भण्डारी स्मृति अन्तर्राष्ट्रिय गोल्डकप फुटबल प्रतियोगिताको फाइनलमा प्रवेश गरेको छ ।
सडन डेथको अन्तिममा रुपक लामाको प्रहार बाहिरिएपछि प्रतिष्ठान तेस्रो पटक उपाधि नजिक पुगेका हो । दास्रो संस्करणको विजेता प्रतिष्ठान गत बर्ष उपविजेता बनेको थियो । निर्धारित समयमा १–१ को बराबरीपछि खेलको निर्णयका लागि टाइब्रेकर गराइएको थियो । त्यसमा पनि बराबरीपछि खेल सडन डेथमा पुगेको थियो ।
आयोजकका दिपक राई, रजिन धिमाल, कर्ण लिम्बू, योगेश गुरुङ, विजय धिमाल, विक्रम लिम्बू र देवेन्द्र तामाङले गोल गरे । एपिएफ आदित्य चौधरी, नविन लामा, मिलन राई, श्याम नेपाली, हरी कार्की र राजेन्द्र रावलले गोल गरे । २९ औं मिनेटमा नविन लामाको पासमा हरी कार्कीले गोल गर्दै एपिएफलाई अघि बढाएका थिए । तर त्यो अग्रता लामो समय रहेन । दीपक राईको पासमा कर्ण लिम्बुले ३५ औं मिनेटमा बराबरी गोल फर्काए । अर्को सेमिफाइनलमा शनिबार विआरसी भुटान र नेपाल आर्मी क्लबबीच हुनेछ ।
