काठमाडौं – राष्ट्रिय टोली स्टार नवयुग श्रेष्ठको २ गोलमा त्रिभुवन आर्मी क्लबले पाँचौ मदन भण्डारी अन्तर्राष्ट्रिय गोल्डकप फुटबल प्रतियोगिताको उपाधि जितेको छ । मोरडको उर्लाबारीमा सामबार आयोजक मदन भण्डारी स्मृति प्रतिष्ठानलाई २–१ गोलमा पराजित गर्दै आर्मीले उपाधि जितेको हो ।
मदन भण्डारी गोल्डकप फुटबल उपाधिका साथ आर्मीका खेलाडी । सबैभन्दा अगाडी नवयुग श्रेष्ठ ।
नवयुगले पहिलो गोल २९ औं मिनेटमा गरेका थिए । बिमल रानाले पासमा नवयुगले पेनाल्टी बक्स भिबबाट गोल गरेका थिए । पहिलो हाफको इन्जुरी समयमा प्रतिष्ठानले खेललाई बराबरीमा ल्याएको थियो । सन्तोष न्यौपानेले गोल गर्दै खेललाई बराबरी पारे । ६२ औं मिनेटमा नवयुगले अर्को गोल गरे र त्यो नै खेलको निर्णायक गोल बन्यो । आर्मीले उपाधि सहित २ लाख २ हजार २ सय रुपैयाँ प्राप्त गर्यो । आयोजकले १ लाख १ हजार १ सयरुपैयाँमा चित्त बुझायो ।
सर्वाधिक गोलकर्ता समेत रहेका नवयुग प्रतियोगिताकै सर्वोत्कृष्ट खेलाडी बने । आर्मीका गंगाराम देउजा उत्कृष्ट गोलकिपर, आर्मीका दिपक गुरुङ उत्कृष्ट रक्षक आयोजकका संजोक लिम्बु उत्कृष्ट मिडफिल्डर, दीपक राई उत्कृष्ट फरवार्ड, सन्तोष न्यौपाने उदयमान खेलाडी छानिए भने आर्मीका चुनबहादुर थापा उत्कृष्ट प्रशिक्षक घोषित भए ।
