काठमाडौं – गत बर्ष नेपाललाई १२ औं दक्षिण एसियाली खेलकुद (साग) र बंगबन्धु गोल्डकप उपाधि दिलाउन सबैभन्दा महत्वपूर्ण भूमिका निर्वाह गरेको नवयुग श्रेष्ठलाई सरकारले प्रवल जनसेवा श्री मानपदवीले सम्मान गर्ने भएको छ ।
नवौं गणतन्त्रण दिवसको अवसरमा शनिबार घोषणा गरेका विभिन्न मानपदवीमध्ये नवयुगसहित अल्ट्रा धाविका मीरा राई, १२ औं सागकी उसुकी निमा घर्तिमगर र १७ औं एसिायली खेलकुदकी कास्य पदक विजेता करातेकी बिमला तामाङलाई प्रवल जनसेवा श्री मानपदवीलेसम्मान गर्ने भएको छ । नेपाली सेनाका नवयुगले एक महिनाको फरकमा तीनवटा ह्याट्रिक गरेका थिए । माघमा बंगलादेशमा भएको बंगबन्धुमा एक ह्याट्रिक गरेका उनले फागुनमा सम्पन्न १२ औं सागमा दुई पटक ह्याट्रिक गरेका थिए ।
सागको उसुमा नेपाललाई स्वर्ण पदक दिलाउने नीमा एक्लो खेलाडी हुनु । मीरा अल्ट्रा धाविकामा विश्व बरियतामा दोस्रो स्थानमा रहेकी छिन् । दुई बर्षअघि कोरियामा भएको एसियाली खेलकुदमा खेलकुदमा नेपालका पदक जित्ने विमला एक्लो खेलाडी हुन् । उनले करातेको एकल कातामा कास्य पदक जितेकी थिइन् ।
त्यस्तै १२औं सागमा पौडीका एक्लै एक रजत र तीन कास्यसहित ४ पदक जितेर कीर्तिमान बनाएकी गौरिका सिंहलाई जनसेवा श्री मानपदवीबाट सम्मानित गरिने भएको छ । सागमा भाग लिन बेलायतबाट भारत पुगेकी उनी सागसके लगत्तै उतै फर्केकी थिइन् ।
गणतन्त्र दिवसकै अवसरमा अन्य सात खेलाडी सुकीर्ति पदकबाट सम्मानित भएका छन् । जसमा दुई भलिबल र बाँकी फुटबलका छन् । भलिबलकी बिनिता बुढाथोकी र सरस्वती चौधरी, राष्ट्रिय महिला फुटबल टोलीकी कप्तान अनु लामा, राष्ट्रिय पुरुष फुटबलका टोलीका खेलाडीहरु रञ्जन विष्ट, आदित्य चौधरी, अमृत चौधरी र मानबहादुर लामाले उक्त सम्मान पाउने भएका छन् ।
