लस एन्जल्स (एजेन्सी) – सालोमोन रोनडोनले पहिलो हाफमा गरेको गोलको मद्दतमा उरुग्वेलाई १–० ले हराएपछि भेनेजुएला अमेरिकामा जारी कोपा अमेरिका सेन्टेनारियोको क्वार्टरफाइनलमा प्रवेश गरेको छ । सन् २००६ यता कोपामा भेनेजुएलालले लगातार दोस्रो खेल जितेको यो पहिलो पटक हो । फिफा वरियताको नवौं स्थानमा रहेको उरुग्वेको अघिल्लो चरणको यात्रा संकटमा परेको छ । उरुग्वेले कोलामा लगातार दोस्रो खेल हारिसकेको छ । जमैका र मेक्सिकोबीचको खेलको नतिजाले प्रतियोगितामा उरुग्वेको यात्राको सम्भावना प्रष्ट हुनेछ ।
गोल गर्ने क्रममा भेनेजुएलाका सालोमोन रोनडोन
रोनडोनले ३६ औं मिनेटमा गोल गर्दै उरुग्वेलाई पछि पारेका थिए । फिफा वरियताको ७७ औं स्थानमा रहेको भेनेजुएललो ६८ औं मिनेटमा अर्को गोलको मौका पाएपनि सफल हुन सकेन । चोटग्रस्त स्टार लुइस स्वारेज विना उत्रेको उरुग्वेका इडिन्सन काभानीले केही मौका पाएपनि गोल गर्न सकेनन् । खेल सकिन एक मिनेटअघि नजिकबाट उनले गरेको प्रहार पोस्टको नजिककैबाट बाहिरिएको थियो ।
बलअघि बढाउने प्रयासमा भेनेजुएलाका सालोमोन रोनडोन (दायाँ) ।
सोही खेलमार्फत उरुग्वेका म्याक्सी पेरिरा राष्ट्रिय टोलीबाट सर्वाधिक खेल खेल्ने खेलाडी बनेको छन् । उनको खेल संख्या १ सय १३ पुगेको छ । उनले डिएगो फोर्लानको कीर्तिमानलाई उछिनेका हुन् ।
सोमबार भेजेजुएलाले मेक्सिको र उरुग्वले जमैकाको सामना गर्नेछ ।
