काठमाडौं (हाम्रो खेलकुद)– दुई विभागिय टोलीबीच प्रधानसेनापति अन्तर्राष्ट्रिय महिला फुटबल उपाधिका लागि आज प्रतिस्पर्धा हुँदैछ । प्रतियोगिताको एक मात्र अपराजित नेपाल एपिएफ क्लबले आयोजक त्रिभुवन आर्मी क्लबबीच फाइनल खेल हुँदैछ ।

भद्रकालीस्थित सैनिक शारीरिक तालिम तथा खेलकुद केन्द्र जङ्गी अड्डाको मैदानमा फाइनल दिउँसो १ः३० बजे सुरु हुने नेपाली सेनाले जनाएको छ । अर्को विभागिय टोली नेपाल पुलिस क्लबलाई ५–२ ले हराउँदै एपिएफ र भुटानको राष्ट्रिय टोलीलाई २–० ले हराउँदै आर्मीले एकअर्कासँगको भेट पक्का गरेका थिए ।

लिग चरणमा एपिएफ र आर्मी एकै समूहमा थिए । जहाँ एपिएफले आर्मीलाई ४–२ ले हराएको थियो । एपिएफले समूह चरणमा सिक्किम युनाइटेडलाई १८–० र प्रदेश १ लाई ९–० ले हराएको थियो । सोही समूहमा सिक्किमलाई १० –० ले हराएको आर्मीले प्रदेश १ लाई ९–० ले नै पराजित गरेको थियो ।

प्रतियोगिताको विजेताले ३ लाख र दोस्रो हुने टोलीले १ लाख ५० हजार रुपैयाँ प्राप्त गर्नेछ । सेमिफाइनल पुग्ने टोलीले समान ५० हजार रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीले स्कुटर प्राप्त गर्नेछिन् ।

त्यस्तै उत्कृष्ट गोलकिपर, मिडफिल्डर, रक्षक, फरवार्ड र प्रशिक्षकले समान १० हजार रुपैयाँबाट पुरस्कृत हुनेछन् । सुरुवाती दुई संस्करण जित्न नसकेको एपिएफ लगातार ४ पटकको च्याम्पियन हो ।