काठमाडौं (हाम्रो खेलकुद)– सिएमजी क्लबले भारतको गुवाहाटीमा आयोजना हुने छैटौं भेट्रान्स अन्तर्राष्ट्रिय फुटबल च्याम्पियनसिपमा भाग लिने भएको छ । नेपाली राष्ट्रिय फुटबल टोलीका पूर्व कप्तान बालगोपाल महर्जनको कप्तानीमा सिएमजीले च्याम्पिनसिपमा भाग लिने लागेको हो ।

१८ खेलाडी र २ अफिसियलसहितको टोली बुधबार त्यसतर्फ प्रस्थान गरेको छ । टोलीमा राष्ट्रिय टोलीका पूर्व कप्तान राकेश श्रेष्ठलगायतका खेलाडी रहेका छन् । १३ औं दक्षिण एसियाली खेलकुद (साग) को सहायक प्रशिक्षकका रुपमा रहेका पूर्व राष्ट्रिय खेलाडी राजेश मानन्धर प्रशिक्षक र फुटबल प्रशिक्षक जयकृष्ण श्रेष्ठ टोलीको व्यवस्थापक रहेका छन् ।

पूर्व राष्ट्रिय खेलाडी एवंम ए डिभिजन लिग समितिका संयोजक विज्ञानराज शर्मा, सिएमजी क्लबका निर्देशक नरेन्द्र शाह अखिल नेपाल फुटबल संघ (एन्फा) का उपाध्यक्ष समेत रहेका राष्ट्रिय टोलीका पूर्व कप्तान उपेन्द्रमान सिंहले टोलीलाई शुभकामना दिदै को विदाई गरेका थिए ।

च्याम्पियनसिपमा नेपालले लगातार भाग लिदै आएपनि टोली सेमिफाइनल भन्दा अघि बढ्न सकेको छैन । यसपटक उपाधि जितेर फर्कने लक्ष्यका साथ जान लागेको कप्तान महर्जनले बताए । बिहीबारदेखि सुरु भइ आइतबार सम्म चल्ने च्याम्पियनसिपमा १२ टोलीको सहभातिगा रहेको छ ।

सहभागी टोलीलाई तीन समूहमा विभाजन गरिएको छ । राउन्ड रोविन लिगपछि समूहको शीर्ष टोली र ३ समूहको उत्कृष्ट उपविजेता सेमिफाइनलमा पुग्नेछ । सिएमजीले कोलकतासँग प्रतिस्पर्धा गर्दै च्याम्पियनसिपको यात्रा थाल्नेछ । युनाइटेड ब्रदर्श क्लबसँग दोस्रो खेल खेल्ने सिएमजीले समूहको तस्रो तथा अन्तिम खेल सिक्किम सँग खेल्नेछ ।

टोलीलाई शुभकामना दिदै सिएमजी क्लबका निर्देशक शाहले उपाधि जितेर फर्कन टोलीलाई शुभकामना दिए । त्यो सँगै उनले भविष्यमा त्यस्ता च्याम्पियनसिप नेपालमै आयोजना गर्न सुझाव दिए । उनले भने,‘ यस्तो च्याम्पियनसिप हामी यहि आयोजना गरौं । हामीले सक्ने सहयोग गर्नेछौं ।’

एन्फा उपाध्यक्ष सिंहले विगतमा आफ्नै कप्तानीमा सिएमजीले गुवाहाटीको च्याम्पियनसिप खेलेको स्मरण गर्दै यसले दक्षिण एसियाका आफ्ना समाकालिन खेलाडीसँग पूर्नमिलनको अवसर हुने बताए । उनले भने,‘ भेटघाट पनि हुने । अनि आफु स्वस्थ रहन पनि यस्ता प्रतियोगिताले मद्दत गर्छन् । सफलताको कामना ।’

कप्तान महर्जनले सिएमजी र त्यसका निर्देशक शाहले खेलकुदलगायत समाजिक काम गर्नुपरेको खुलेर प्रशंसा गरेका थिए । ‘ खेलकुद विकासमा उहाँहरुको ठूलो भूमिका रहेको छ,’ उनले थपे,‘ खेलकुदलगायत साभाजिक क्षत्रमा पनि उहाँहरुले गर्नु भएको काम सराहानिय छ । ’