काठमाडौं (हाम्रो खेलकुद)– रुस्लान थ्री स्टार क्लब सर्वाधिक पुरस्कार राशीको नेपाल आईस चौथो सुदूरपश्चिम खप्तड गोल्डकप फुटबल प्रतियोगिताको सेमिफाइनल पुगेको छ । सिमराको नव जनजागृती युवा क्लबलाई बुधबार २–० ले हराउँदै थ्री स्टार अन्तिम चारमा पुगेको हो ।

खेलको अन्त्यतिर सन्जोक राई र आशिष राईको गोलमा थ्री स्टारले जित हासिल गरेको थियो । साताको सुरुवातमा झापा झिझिलेमा सताक्षी गोल्डकप फुटबल प्रतियोगिताको फाइनल खेलेर थ्री स्टार धनगढी पुगेको थियो । सताक्षीको फाइनलमा थ्री स्टार लिग विजेता सानमिगल मछिन्द्र क्लबसँग १–० ले पराजित भएको थियो ।

धनगढी रंगशालामा बुधबार गोलरहित बराबरीतर्फ अघि बढेको खेलको अन्त्यतिर थ्री स्टारले एक मिनेटको अन्तरमा २ गोल गरेको थियो । सन्जोकले ८० औं र आशिषले ८१ औं मिनेटमा गोल गरेका थिए । दुवै गोलमा निशान खड्काको भूमिका महत्वपूर्ण रहेको थियो । निशानको क्रसमा सन्जोकले हेडमार्फत गोल गरेका थिए । त्यस्तै निशानकै पासमा आशिषले पेनाल्टी बक्स भित्रबाट शक्तिशाली प्रहार गर्दै गोल गरेका थिए । खेलको म्यान अफ द म्याच थ्री स्टारका कप्तान विक्रम लामा भए ।

सुदूरपश्चिम ११ स्पोर्टस क्लबको आयोजनामा जारी प्रतियोगिताको विजेताले २१ लाख १ हजार र दोस्रो हुने टोलीले १० लाख १ हजार रुपैयाँ प्राप्त गर्नेछ । विहीबार प्रतियोगिताको क्वाटरफाइनलमा विभागीय टोली नेपाल पुलिस क्लब र नेपाल एपीएफ क्लब भिड्नेछन् ।