एजेन्सी – युरोपियन फुटबलको सर्वाेच्च निकाय (युइएफए) ले युरोपियन क्लब फुटबलको सबैभन्दा चर्चित युइएफए च्याम्पियन्स लिग र युइएफए युरोपा लिग फुटबलको फाइनल खेल चार सातापछि गर्ने निर्णय गरेको छ ।

युइएफएले विश्वभर महामारीको रुपमा फैलिएको कोरोना भाईरस (कोभिड–१९) को जोखिमलाई मध्यनजर गरेर च्याम्पियन्स लिग र युरोपाको फाइनल खेल चार साता पछि सारेको हो । युइएफएको मंगलबार बसेको भिडियो कन्फ्रेस बैठकले कोरोना भाइरसका कारण सबै प्रतियोगिताहरु सार्नुपरेको उल्लेख गरेको छ ।

नयाँ मिति अनुसार अब च्याम्पियन्स लिगको फाइनल २७ जुन २०२० मा टर्कीको इस्तानुबुलमा हुनेछ । युरोपा लिगको फाइनल २४ जुनमा पोल्यान्डमा हुनेछ । यसअघि नियमित तालिका अनुसार च्याम्पियन्स लिगको फाइनल ३१ मे र युरोपाको फाइनल २७ मे लाई तय भएको थियो ।

च्याम्पियन्स लिगको प्रि–क्वाटरफाइनलको पहिलो लेग चलिरहँदा चीनबाट कोरोना भाइरसको संक्रमण फैलिएको थियो । त्यसपछि दोस्रो लेगका केही खेल चलिरहँदा युइएफएले खेललाई स्थगित गरेको थियो । केही खेलहरु खाली रंगशालामा समेत खेलाइएको थियो ।

कोरोनाकै कारण युइएफएको मंगलबारको बैठकले यही जुन–जुलाईलाई तय भएको युरोकप २०२० अर्काे वर्ष अर्थात २०२१ जुन–जुलाईमा गर्ने निर्णय गरेको छ । अहिले सम्पुर्ण खेल गतिविधि ठप्प भएको छ । इंग्लिस प्रिमियर लिग, जर्मन बुन्डेस लिगा, स्पेनिस ला लिगा, फ्रेन्च लिग वान र इटालियन सिरी ‘ए’ का खेलहरु ४ अप्रिलसम्मका लागि स्थगित भएको छ । ४ अप्रिलपछि अर्काे निर्णय आउन सक्नेछ ।