एजेन्सी – स्पेनिस महारथी रियल म्याड्रिडले आउँदो समरमा आफ्ना स्टार फरवार्ड ग्यारेथ बेललाई अन्यत्र पठाउने बताइसकेको छ । रियल छाडेपछि वेल्सम्यान बेलको यात्रा पुनः इंग्लिस प्रिमियर लिग नै हुने अनुमान गरिएको छ ।

तर, महँगो तलबका कारण बेलको प्रिमियर लिग यात्रा असम्भव जस्तै हुने भएको छ । ३० वर्षीय बेललाई अहिले कम्तीमा पनि एक सिजनको १३.४ मिलियन पाउन्ड खर्चनु पर्नेछ । जुन बढ्दो उमेरका बेलका लागि प्रिमियर लिग क्लबले चासो नदिन सक्नेछ ।

बेल र रियलका प्रशिक्षकबीच पछिल्लो समय सम्बन्ध राम्रो रहेको छैन । खराब सम्बन्धकै कारण बेलले गत सिजन नै क्लब छाड्ने निर्णय गरेका थिए । बेलले चिनिया सुपर लिग क्लब रोजेपछि रियलले बेललाई रोकेको थियो ।

बेलले यो सिजन रियलबाट १८ पटकमात्रै मौका पाएका छन् । यता टोटेनहम आफ्ना पुर्व खेलाडीलाई फर्काउन चाहिरहेको छ । तर, एएसका अनुसार बेलको एजेन्ट बेलको तलबक कारण प्रिमियर लिग फिर्ती असम्भव रहेको बताउछन् । एएसका अनुसार अब बेलको गन्तव्य अमेरिकी मेजर लिग सकर (एमएलएस) हुने आँकलन गरिएको छ ।

बेल २०१३ मा इंग्लिस क्लब टोटेनहमबाट कीर्तिमानी मुल्यमा रियलमा पुगेका थिए । पछिल्लो समय बेलले रियलको समर्थकको मन जित्न सकेका छैनन् । केही समय चोटबाट ग्रसित बनेका बेलले स्पेनिस भाषा सिक्न नसक्दा पनि आलोचनाको शिकार भएको थिए ।

रियलले बेलले आफ्नो तलब कम गरे २०२२ सम्म क्लबमा नै राख्ने बताउँदा बेलले यो कुरालाई नकार्दै क्लब छाड्ने बताइसकेको छ । रियलले यसै सिजन फ्रान्कफर्टबाट आएका लुका जोभिचलाई पनि बेच्ने तयारी गरेको छ ।