एजेन्सी – विश्व फुटबलको सर्वोच्च निकाय फिफाले कोरोना संक्रमणको विश्रामपछि फुटबल सुचारु भएको अवस्थामा एकै खेलमा पाँच खेलाडी परिवर्तन गर्न पाउने प्रावधानसहितको प्रस्ताव आईएफएबीलाई प्रस्तुत गरेको छ ।

अन्तर्राष्ट्रिय स्तरमा फुटबलको नियम स्थापित गर्ने संस्था इन्टरनेसनल फुटबल एसोसिएसन बोर्ड (आईएफएबी) ले निर्णय गरेपछि मात्र यो प्रस्तावले आधिकारिकता पाउनेछ । विश्व फुटबलले खेल संचालनका लागि मान्दै आएको नियम (लज अफ द गेम) आईएफएबीले नै संरक्षण तथा समायोजन गर्दै आएको छ । आईएफएबीको स्वीकृति प्राप्त भएपछि मात्र फिफाले सदस्य राष्ट्रलाई यसको अबलम्बन गर्न निर्देशन दिनेछ ।

फिफाका प्रवक्ताका अनुसार खेलाडीको स्वास्थ्य ध्यानमा राख्दै यो कदम चालिएको हो । ‘ जब खेल पुन सुरु हुन्छ, अवश्य पनि खेलाडीहरुले कम समयमा धेरै खेल खेल्नुपर्ने हुन्छ । यस्तो अवस्थामा खेलाडीको स्वास्थ्यलाई प्राथमिकतामा राख्न जरुरि छ । त्यसैले हामीले पाँच खेलाडी परिवर्तन गर्ने प्रस्ताव पेस गरेका छौं,’ उनले भने । हाल हरेक टोलीले एक खेलमा तीन खेलाडी परिवर्तन गर्न पाउँछन् भने अतिरिक्त समयमा खेल धकेलिए चौथो खेलाडी परिवर्तन गर्न पाइन्छ ।

फिफाले लज अफ द गेममा रहेको तेस्रो नियम अर्थात् खेलाडी परिवर्तनमा केहि समयका लागि ‘ टोलीले ५ खेलाडी परिवर्तन गर्न पाउने र अतिरिक्त समयमा लम्बिएको खेलमा छैटौं खेलाडी परिवर्तन गर्न पाउने ।’ प्रस्ताव पेस गरेको छ । आईएफएबीले यस विषयमा चाडै निर्णय लिने बुझिएको छ । केहि लिगहरु मे महिनामा नै सुचारु हुने सम्भावना भएकाले विश्वव्यापी रुपमा यसलाई लागु गर्न अध्ययन सुरु भैसकेको छ ।

केहि फुटबल विश्लेषकले यस कदमको स्वागत गर्दै खेलाडी परिवर्तन गर्ने पद्दति भने परिमार्जन गर्नुपर्ने बताएका छन् । केहि टोलीले यसको नचाहिँदो फाइदा उठाउने पनि सम्भावना रहेकाले टोलीले तीन पटक मात्र खेलाडी परिवर्तन गर्न पाउने नियम भने राख्नुपर्ने जिकिर छ । यसो गर्दा एकैपटकमा दुई-तीन जना अथवा मध्यान्तरमा खेलाडी परिवर्तन गर्नुपर्ने हुन्छ ।

फिफाको नजिकका स्रोतका अनुसार यो नियम सन् २०२०-२१ सिजनसम्म पनि लागु हुने सम्भावना रहेको छ । यस सिजनको असर अर्को सिजनमा पनि प्रत्यक्ष रुपमा पर्ने भएकाले केहि समयका लागि यसलाई निरन्तरता दिइने उनले बताए । यद्यपि हरेक लिगले यसलाई अबलम्बन गर्ने वा नगर्ने भन्ने विषयमा आफैं निर्णय लिन सक्नेछन् ।

यो पनि पढ्नुहोस : फुटबलका यी नियम विश्वभर परिवर्तन हुँदै