काठमाडौं (हाम्रो खेलकुद)– तेक्वान्दोका कीर्तिमानी खेलाडी संगिना वैद्य र दीपक विष्टले तेक्वान्दो संघको केन्द्रिय समितिको जिम्मेवारीबाट राजिनामा दिएका छन् । त्यस्तै अखिल नेपाल फुटबल संघ (एन्फा) का उपाध्यक्ष उपेन्द्रमान सिंहले राष्ट्रिय खेलकुद परिषद् (राखेप) को फुटबल प्रशिक्षकबाट राजीनामा दिने निर्णय गरेका छन् ।

राष्ट्रिय खेलकुद विकास ऐन २०७७ लागु भएसँगै संघ वा प्रशिक्षकका रुपमा कार्यरतले एउटा ठाँउबाट रोज्नु पर्ने बाध्यात्मक अवस्था सृजना भएको हो । त्यसैका आधारमा तेक्वान्दो संघका सचिव र प्रवक्ता रहेका दीपक तथा सदस्य रहेकी संगिनाले पदबाट राजीनामा दिएका हुन् । उनीहरुले प्रशिक्षकका रुपमा कार्यरत रहने निर्णय लिएका छन् ।
उपेन्द्रमानले भने एन्फा राजेका छन् ।

तीनै खेलाडीले दक्षिण एसियाली खेलकुद (साग) मा स्वर्ण पदक जिते वापत सम्मान स्वरुप प्रशिक्षकको नियुक्ती पाएका थिए । राष्ट्रिय फुटबल टोलीका पूर्व कप्तान समेत रहेका गोलकिपर उपेन्द्रमान सन् १९९३ मा नेपाली फुटबल टोलीले स्वर्ण पदक जित्दाका सदस्य थिए । भारतसँग २–२ को बराबरीपछि टाइब्रेकरमा नेपालले फाइनल जित्दा उपेन्द्रमानले नै पोष्ट सम्हालेका थिए । यद्दपी उनले २०६३ सालमा जीवनराम श्रेष्ठ सदस्य सचिव भएका बखत करारमा प्रशिक्षकको नियुक्ती पाएका थिए ।

उपेन्द्रले स्वर्ण पदक विजेताका रुपमा सम्मान स्वरुप प्राप्त गरेको प्रशिक्षक पद त्याग्नु पर्दा खुसी नलागेको बताएका छन् । ‘दुई मध्ये एक रोज्नुपर्ने बाध्यात्मक परिस्थिति पर्यो’, उनले भने, ‘एन्फामा पनि एउटा जिम्मेवारी लिएको छु । बीचमा छाड्नु उपयुक्त लागेन । बाध्यतावश प्रशिक्षक पद त्याग्ने निर्णय लिएको छु । उपेन्द्रमान दुई वर्षअघि एन्फाको उपाध्यक्षमा निर्वाचित भएका थिए ।’

दीपक र संगिनाले आठौं र नवौं सागमा लगातार स्वर्ण पदक जितेका थिए । त्यस्तै संगिनाले छनोट चरण पार गरेर सन् २००४ को एथेन्स ओलम्पिक खेलेकी थिइन् । उनी ओलम्पिकमा छनोट हुने पहिलो नेपाली हुन् । दीपकले भने आठौं, नवौं हुँदै १० औं र ११ औंमा लगातार ४ स्वर्ण पदक जितेका थिए । त्यस्तै उनले २००२ र २००६ एसियली खेलकुदमा कास्य पदक पनि जितेका थिए । त्यस्तै २००८ मा उनले छनोट चरण पार गरेर बेजिङ ओलम्पिक खेलेका थिए ।

संघमा बसेर आफुले सक्रियतापूर्वक काम गर्दै आएको अवस्थामा नयाँ ऐनले एउटा रोज्न बाध्य हुनु परेको उल्लेख गर्दै दीपकले भने, ‘भोलीको दिनमा संघमा आवश्यकता परेको खण्डमा प्रशिक्षक पद त्यागेर संघमा जान म तयार छु ।’

यसअघि दोहोरो जिम्मेवारीमा ३३ जना राखेपका कर्मचारी तथा प्रशिक्षकले सम्वन्धित संघबाट तथा प्रशिक्षक पदबाट राजीनामा दिइसकेका छन् ।