सुबास हुमागाईं, काठमाडौं

नेपाली राष्ट्रिय फुटबल टोलीका फरवार्ड विमल घर्तीमगरले राष्ट्रिय टोलीको प्रशिक्षणका दौरान ठूलो चोट बोकेका छन् । गत साता सुरु भएको प्रशिक्षणबाट झन्डै १ वर्षपछि राष्ट्रिय टोलीमा पुनरागमन गरेका विमलको घुँडामा चोट लागेको हो ।

फाइल तस्बिर

शुक्रबार विहान प्रशिक्षणमा अभ्यास म्याचका दौरान ल्यान्डिङ नमिल्दा उनको घुँडामा चोट लागेको थियो । शुक्रबार दिउँसो नै मेडिकल टोलीले उनको चोटको एमआरआई गरेपछि तीन गम्भीर चोट देखा परेको हो । उनको एन्टेरियर क्रुसिएट लिगामेन्ट (एसीएल) च्यातिएको छ भने मेडीएल कोल्याटरल लिगामेन्ट (एमसीएल) मा पनि हल्का चोट देखिएको छ । यस्तै ल्याटरल मेनिस्कसमा पनि केहि चोट रहेको प्रारम्भिक रिपोर्टले देखाएको छ ।

झन्डै १ वर्षपछि राष्ट्रिय टोलीमा समावेश विमल क्याम्पमा सिनियर खेलाडीसँग नै प्रशिक्षण गर्दै आएका थिए । गत महिना बंगलादेशविरुद्ध मैत्रीपूर्ण खेल खेल्नुअघि टोलीले खेलसहित झन्डै एक महिना तयारी गरेको थियो । लामो समयपछि मैदान फर्किएका विमल लगायत कप्तान विराज महर्जन, आदित्य चौधरी, लगायत खेलाडीले सिनियर खेलाडीसँग नै प्रशिक्षण गर्दै आएका छन् ।

प्रशिक्षक महर्जनले विमलको चोट दुर्भाग्यपूर्ण रहेको बताए । ‘विमलले शुक्रबार खेलका दौरान चोट बोके ‌। स्वास्थ्य टोलीबाट खबर पाएअनुसार उनको चोट गम्भीर छ र शल्यक्रिया नै गर्नुपर्छ । लामो समयपछि टोलीमा फर्केका उनी अब टोलीबाट बाहिर रहनेछन्,’ उनले भने ।

प्रशिक्षक बालगोपाल महर्जनले ५८ खेलाडीलाई दुई समूह विभाजन गरेर विहान र दिउँसो प्रशिक्षण दिँदै आएका छन् । लामो समयपछि मैदान फर्केपनि सिधै म्याच फिटनेस रहेका खेलाडीसँग खेलाउँदा नयाँ खेलाडीमा धपेडी बढेको अनुमान गरिएको छ । त्यसो त विमलले ए डिभिजन लिगको अन्तिम खेलमा मछिन्द्रको लागि खेलेपछि दुई मोफसल प्रतियोगिता खेलेका थिए । त्यसपछि उनी मैदानमा देखिएका छैनन् ।

विमलले राष्ट्रिय टोलीको प्रशिक्षणकै दौरान चोट बोकेका कारण उनको सम्पूर्ण उपचार खर्च एन्फाले बेहोर्ने बुझिएको छ । शनिबार चोटको रिपोर्ट आएपछि राष्ट्रिय टोलीको व्यवस्थापनले एन्फा नेतृत्वलाई यसबारे जानकारी दिइसकेको छ । एन्फा अध्यक्ष कर्मा छिरिङ शेर्पा हाल कतार भ्रमणमा छन् । एन्फाले अब कतारस्थित विश्व प्रसिद्ध अस्पेटारमा उनको उपचारका लागि पहल गर्ने सम्भावना रहेको छ ।

यसअघि एन्फाकै पहलमा राष्ट्रिय खेलाडी रविन श्रेष्ठ र तत्कालिन गोलरक्षक प्रशिक्षक नविन महर्जनले उपचार गराएका थिए । रविनले त्यसपछि पुनरागमन गरेपनि फेरी चोट बोक्न पुगेका थिए । अहिले उनी फिजियोथेरापीमै व्यस्त छन् । प्रशिक्षक नविन भने अहिले एन्फाको युथ फुटबल विभागको प्रमुख हुन् ।

विमलको चोटमा राम्रो शल्यक्रिया र फिजियोथेरापी भएको खण्डमा उनी पूर्ण रुपमा ठिक भएर मैदान फर्कन झन्डै १ वर्ष लाग्नेछ । यसअघि मिडफिल्डर रोहित चन्दले सन् २०१६ मा एसीएल इन्ज्युरी भएपनि कडा मिहिनेतपछि झन्डै १ वर्षमा कमब्याक गरेका थिए । यस्तै चोट लागेका अन्य खेलाडीमा भने नेपालमा पुनरागमन गरेको उदाहरण निकै कम छ । भलिबल खेलाडी प्रतिभा मालीको पनि गत वर्ष यस्तै किसिमको चोट लागेको थियो । उनी अहिले फिजियोथेरापीको अन्तिम चरणमा रहेर कोर्टमा हल्का प्रशिक्षणमा फर्किसकेकी छिन् ।