एजेन्सी – बार्सिलोनाका प्रशिक्षक रोनाल्ड कोम्यानका लागि केहि सकारात्मक दृश्य देखिएको छ । ओसमाने डेम्बेले चोटमुक्त भएर आइतबार टोलीको अभ्यासमा फर्केका छन् । उनको चोटको अवस्था हरेक दिन परिक्षण गरिएको छ ।

चोटमुक्त हुने क्रममा रहेका उनले साताको सुरुवातमा अभ्यास गरेका हुन् । तर, के उनी अब नियमित रुपमा टोलीको पहिलो रोजाईमा खेल्ने छन् भन्ने प्रश्न यथावत छ । लगातार चोटका कारण मैदान बाहिर रहेकाले उनलाई लिएर प्रशिक्षक कोम्यान सचेत रहनेछन् ।

च्याम्पियन्स लिगका दौरान चोट लागेपछि उनी मैदान बाहिर रहँदै आएका छन् । त्यसैले मंगलबार रियल भालाडोलिडविरुद्धको खेलमा उनलाई खेलाउने सम्भावना कम छ ।

डिसेम्बर २९ मा इल्बारविरुद्धको खेलमा भने उनी खेल्ने सम्भावना रहेको बताइएको छ । त्यसका लागि अझै झन्डै १० दिन बाँकी रहेको छ । त्यति बेला सम्म उनी पूर्ण रुपमा फिट हुने अपेक्षा गरिएको छ ।

कोम्यानलाई जति सक्दो छिट्टो आफ्ना खेलाडीलाई पुनरागमन गराउन चाहन्छन् । फ्रान्सिस्को ट्रिनकाअोले अपेक्षा अनुसार प्रदर्शन गर्न नसकेका कारण पनि डेम्बेलेको आवश्यकता बढी महसुस गरिएको छ ।

चोट कारण अन्सु फाती लामो समय मैदान बाहिर रहने भएकाले पनि फ्रान्सेली डेम्बेले टोलीको आवश्यकता बनेका छन् । त्यस्तै टोलीका दुई अन्य महत्वपूर्ण खेलाडी सर्जी रोबेर्टो र जेरार्ड पिके चोटग्रस्त छन् ।

रोबेर्टो अझै महिना दिन मैदान बाहिर रहने अनुमान गरिएको छ । पिके भने अहिले नै फर्कने सम्भावना छैन । चोटग्रस्त भएपछि उनी कम्तीमा ५ महिना मैदान बाहिर रहने अनुमान गरिएको थियो ।